Bilim orqali do‘stlik. Malaziyalik o‘quvchilarning CHDPUga tashrifi
“Internationalisation Of Fully Residential Schools Young Leaders To Uzbekistan” loyihasi doirasida Malayziyadan 40 nafar iqtidorli yoshlar va ularning ustozlari universitetimizga tashrif buyurdi.
Start – Akademik litsey
Tashrif akademik litseydan boshlandi. Ingliz tilida o‘tilgan biologiya, kimyo va matematika fanlaridan zamonaviy ochiq darslar mehmonlarda katta qiziqish uyg‘otdi. Darslardan so‘ng litsey bo‘ylab ekskursiya uyushtirilib, o‘quvchilar ta’lim muhiti bilan yaqindan tanishishdi.
Tabiiy fanlar fakulteti – ilm va innovatsiya maskani
Malayziyalik yoshlarning keyingi manzili Tabiiy fanlar fakulteti bo'lib, laboratoriyalar, issiqxonalar va fakultet muzeyidagi noyob namunalarni ko‘zdan kechirishdi. Ular O‘zbekistonning tabiiy boyliklari, ilmiy izlanishlar va talabalarning amaliy ishlari bilan yaqindan tanishib, ko‘plab savollariga javob olishdi.
“Galleriya” – san’at va ilhom makoni
San’atshunoslik fakulteti qoshidagi “Galleriya” esa Malayziyalik mehmonlar uchun kutilmagan kashfiyot bo‘ldi. Talabalarimiz chizgan suratlar, yasalgan haykallar va liboslar ularda katta hayrat va qoyil qolish hissini uyg‘otdi.
Turizm fakulteti – sertifikatlar va yangi kelishuvlar
Tashrif Turizm fakultetida davom etdi. Samimiy tushlikdan so‘ng faollar zalida tantanali marosim bo‘lib o‘tdi. Unda universitet rahbariyati va Lingvistika va ingliz tilini o‘qitish metodikasi kafedrasi jamoasi ishtirok etib, malayziyalik o‘qituvchi va o‘quvchilarga sertifikatlar topshirdilar.
O'z navbatida, Malayziya tomoni ham Chirchiq davlat pedagogika universiteti professor-o‘qituvchilariga hurmat va minnatdorchilik ifoda etdi.
Uchrashuv yakunida:
- ikki tomonlama barqaror xalqaro hamkorlik,
- talaba va o‘qituvchilar almashinuvi,
- qo‘shma ta’lim va madaniy loyihalarni yo‘lga qo‘yish bo‘yicha kelishuvlarga erishildi.
Tashrif Chirchiq davlat pedagogika universitetining xalqaro maydondagi nufuzi ortib borayotganidan dalolat bo‘lib, yoshlarimiz uchun yangi imkoniyatlar eshigini ochadi.
Universitet Axborot xizmati
Galereya
