Universitet kengashi

Universitet Kengashi O‘zbekiston Respublikasining tegishli qonun va qarorlariga asosan tashkil etilgan bo‘lib, rektor raisligida faoliyat yuritadi. Kengash tarkibi rektor, prorektorlar, fakultet dekanlari, kafedra mudirlari va jamoat tashkilotlari vakillaridan iborat bo‘lib, a’zolar 5 yillik muddatga saylanadi.

Kengash faoliyatining huquqiy asoslari

• O‘zbekiston Respublikasining “Ta’lim to‘g‘risida”gi qonuni
• 2019-yil 17-iyundagi 4358-son qaror – “2019-2023 yillarda Mirzo Ulugbek nomidagi O‘zbekiston Milliy universitetida talab yuqori bo‘lgan malakali kadrlar tayyorlash tizimini tubdan takomillashtirish va ilmiy salohiyatni rivojlantirish chora-tadbirlari to‘g‘risida”
• 2021-yil 24-dekabrdagi PQ-60-son qaror – “Davlat oliy ta’lim muassasalarining akademik va tashkiliy-boshqaruv mustaqilligini ta’minlash bo‘yicha qo‘shimcha chora-tadbirlar to‘g‘risida”
• 2019-yil 27-maydagi PF-5729-son farmon – “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbarlari to‘g‘risida”
• 2019-yil 8-oktabrdagi PF-5847-son farmon – “O‘zbekiston Respublikasi oliy ta’lim tizimini 2030-yilgacha rivojlantirish konsepsiyasini tasdiqlash to‘g‘risida”
• 2006-yil 10-fevraldagi 20-son Nizom – “Oliy ta’lim muassasalariga pedagog xodimlarni tanlov asosida ishga qabul qilish tartibi to‘g‘risida” (Vazirlar Mahkamasi tasdiqlashi)
• 2017-yil 22-maydagi 304-son qaror – “Oliy o‘quv yurtidan keyingi ta’lim tizimini takomillashtirish chora-tadbirlari to‘g‘risida”
• 2019-yil 19-iyuldagi 606-son qaror – “Oliy malakali ilmiy va ilmiy-pedagog kadrlarni maqsadli tayyorlash tizimini takomillashtirish to‘g‘risida”
• “Oliy ta’lim Kengashi to‘g‘risida Nizom”

Kengashning Tashkiliy Tuzilishi

Universitet Kengashi rektor raisligida tashkil etiladi. Tarkibiga rektor, prorektorlar, fakultet dekanlari, yuridik tashkilotlar rahbarlari, jamoat tashkilotlari rahbarlari va talabalar vakillari kiradi. Kengashning boshqa a’zolari, shu jumladan kafedra mudirlari, fakultet umumiy majlisida yashirin ovoz berish orqali saylanadi. Professor-o‘qituvchilar tarkibidan Kengashga saylanuvchi a’zolar soni rektor buyrug‘i bilan belgilanadi.

Vakolat Muddati va Saylash Tartibi

Kengash a’zolarining vakolat muddati 5 yilni tashkil etadi. Kengash tarkibini 5 yil muddatdan keyin qayta shakllantirish taklifi rektor tomonidan majlis kun tartibiga kiritiladi va rektor buyrug‘i bilan tasdiqlanadi. Yangi a’zolar har o‘quv yili boshida yoki sabablarga ko‘ra kiritiladi.

Maqsad va Vazifalari

Maqsad: intellektual salohiyat va oliy ta’lim mazmunini sifat jihatdan yangi bosqichga ko‘tarish, mehnat bozorida raqobatbardosh malakali kadrlar tayyorlash, oliy ta’limning investitsiyaviy jozibadorligini oshirish, xalqaro tajribalar asosida kredit-modul tizimini joriy etish va Universitetni xalqaro reytinglarda yuqori o‘rinlarga olib chiqish.

Vazifalari:

• Davlat ta’lim standartlari, o‘quv rejalari va dasturlari ijrosini ta'minlash.
• Korrupsiyaga qarshi kurashish choralarini ishlab chiqish va nazorat qilish.
• Malakali kadrlar tayyorlash va ilmiy salohiyatni rivojlantirish dasturlari ijrosini muhokama qilish.
• O'quv, ma’naviy-ma’rifiy, ilmiy-tadqiqot va xalqaro aloqalar bo'yicha ishlarni tahlil qilish va qarorlar qabul qilish.
• Professor-o‘qituvchilar lavozimlarini egallash uchun tanlovlar o'tkazish, "professor" va "dotsent" ilmiy unvonlariga tavsiya etish.
• Darslik va o‘quv qo‘llanmalarni nashrga tavsiya etish.
• Ilmiy ishlarni Davlat mukofotlariga, nomzodlarni esa Fanlar akademiyasi akademikligiga tavsiya qilish.
• Xorijiy olimlar va mutaxassislarga “Faxriy professor” unvonini berish masalalarini ko'rib chiqish.
• Yosh olimlarni xorijiy stajirovka, magistratura va doktoranturaga yuborishga tavsiya etish.
• Doktorlik dissertatsiyalari mavzularini tasdiqlash.
• Iqtidorli talabalarni Prezident va nomli davlat stipendiyalariga tavsiya etish.
• Buyurtmachi korxonalar bilan hamkorlikni rivojlantirish va talabalar amaliyotini takomillashtirish.
• Xorijiy OTMlar bilan hamkorlik, akademik mobillik dasturlarini yo'lga qo'yish.
• Universitet tuzilmasiga o‘zgartirishlar kiritish (fakultet, kafedra, markazlar ochish).
• Talabalar va xodimlar uchun mehnat muhofazasi va texnika xavfsizligi sharoitlarini yaxshilash.

Kengash faoliyatini tashkil etish va kun tartibi

Kengash ish rejasi prorektorlar, bo‘lim boshliqlari, dekanlar va kafedra mudirlarining takliflari asosida ishlab chiqiladi va o'quv yili davomida yangi vazifalardan kelib chiqib to'ldirilishi mumkin. Prezident Farmon va Qarorlari, Vazirlar Mahkamasi qarorlari va vazirlik buyruqlari bilan bog‘liq masalalar kun tartibiga birinchi navbatda kiritiladi.

Hujjatlarni taqdim etish tartibi

• Kun tartibidagi asosiy masalalar bo‘yicha ma’ruza matni, qaror loyihasi va taqdimot materiallari yig‘ilishdan kamida 3 kun oldin Kengash kotibiga topshirilishi kerak.
• Qisqa yoki turli masalalar bo‘yicha materiallar yig‘ilishdan kamida 2 kun oldin taqdim etiladi.
• Barcha masalalar kun tartibiga Kengash raisining roziligi bilan kiritiladi.

Majlis reglamenti

• Asosiy masalalar bo‘yicha ma’ruzaga – 15 daqiqagacha;
• Muhokama va takliflar uchun – 5 daqiqagacha;
• Turli masalalar bo‘yicha – 5 daqiqagacha vaqt ajratiladi.