CHDPU da Amir Temur tavalludining 690 yilligi keng nishonlanmoqda

     Davlatimiz rahbari qarori bilan buyuk davlat arbobi va sarkarda, ilm-fan, madaniyat va san’at homiysi sohibqiron Amir Temur tavalludining 690 yilli Chirchiq davlat pedagogika universitetida keng nishonlanmoqda. Universitet jamoatchiligi temuriylarga oid yozma manbalar asosida seminarlar, turli treninglar, master-klasslar, tanlovlar va intellektual musobaqalar tashkil etmoqda. Amir Temur boy merosi bilan bog‘liq shaharlar va muzeylarga ekskurtsiyalar uyushtirilmoqda. Filmlar namoyishi va teatrlarga tashrif tashkil etilmoqda. Universitet olimlari xalqaro konferesiyalarda qatnashmoqda.

     Bugun Chirchiq davlat pedagogika universitetida Amir Temur tavalludining 690 yilligiga bag‘ishlangan “Amir Temur – Ikkinchi renessans homiysi” mavzusida badiiy-ma’rifiy tadbir bo‘lib o‘tdi. Tadbirda Chirchiq davlat pedagogika universiteti rektori G‘ofurjon Muxamedov, O‘zbekiston Xalq artisti Tesha Mo‘minov, Turon Fanlar akademiyasi prezidenti Haydarbek Bobobekov, Temuriylar tarixi davlat muzeyi xodimi Saidbahrom Azizov, Quruqlikdagi qo‘shinlar instituti podpolkovnigi Nodirbek Xoliqov, universitet professor-o‘qituvchilari, xodimlari va talabalari ishtirok etdilar.

     Ishtirokchilarda olimlar tomonidan berilgan oxirgi ma’lumotlar, yangiliklar katta qiziqish uyg‘otdi. Buyuk sarkardaning jahon tarixida tutgan o‘rnidan tortib, bugungi kun hayotimizda asqotayotgan o‘lmas merosi, xususan, tartib-tadbirlari, islom diniga, olim-u fuzalolarga, fan va adabiyotga, oilaga bo‘lgan munosabati, hozirga qadar ma’lum bo‘lmagan qirralari faktlar asosida so‘zlab berildi va bular talabalar olqishiga sazovor bo‘ldi. 

     O‘zbekiston xalq artisti Tesha Mo‘minov o‘zbek teatr va kino sahnasida Amir Temur obrazini gavdalantirgan aktyor sifatida Sohibqironning nafaqat jangchi, balki buyuk davlat arbobi, adolatparvar va ma’rifatli shaxs sifatidagi qirralarini ochib berdi.

     Shuningdek, O‘zbekiston hukumatining ulug‘ ajdodlarimiz merosini o‘rganish va targ‘ib qilish borasida olib borayotgan ishlari to‘g‘risida ham aytib o‘tildi.

     Tadbirda Tarix kafedrasi talabalarining kompazitsion va "Yosh Temurbeklar" harbiy-sport NTM o‘quvchilarining ko‘rgazmali chiqishlari yig‘ilganlarga birdek manzur bo‘ldi. 

     Amir Temur tavalludining 690 yilligi munosabati bilan ko'rgazma tashkil etildi.

Universitet Axborot xizmati