Chirchiq davlat pedagogika universitetida Toshkent viloyati Yoshlar akademiyasining 1-sonli kengaytirilgan seminari tashkil etildi

     Seminar doirasida viloyatdagi 17 ta oliy ta’lim muassasasidan tashrif buyurgan liderlar dastlab Gumanitar fanlar fakultetida yaratilgan zamonaviy sharoitlar bilan yaqindan tanishdilar.

     Fakultet liderlari tashabbusi bilan tashkil etilgan loyiha va startaplar ko‘rgazmasida yoshlarning ilmiy-innovatsion g‘oyalari, amaliy ishlanmalari va istiqbolli tashabbuslari namoyish etildi.

     Ilmiy ishlar va innovatsiyalar bo‘yicha prorektor Baxodir Eshchanov akademiya liderlari faoliyatini yanada takomillashtirish, ularning ish samaradorligini yagona indikatorlar asosida baholash masalalariga to‘xtalib, o‘quv yilining ikkinchi yarmida liderlarga muvaffaqiyat tiladi.

     Yoshlar akademiyasi Toshkent viloyati hududiy lideri Odiljon Sirojiddinov akademiyaning kelgusidagi ish rejalari, faoliyat jarayonlarini raqamlashtirish, hisobot tizimini takomillashtirish hamda ijtimoiy tarmoqlardagi faollikni oshirish bo‘yicha muhim vazifalar yuzasidan takliflar ilgari surdi.

     Yoshlar akademiyasi lideri Diyorbek Turg‘unpo‘latov esa Chirchiq davlat pedagogika universiteti misolida akademiyaning 2024/2025 o‘quv yilidagi faoliyati, erishilgan natijalar va ilg‘or tajribalar bilan o‘rtoqlashdi.

     Seminar yakunida faol ishtirok etgan 40 ga yaqin liderlar universitet rektorining maxsus sertifikatlari va esdalik sovg‘alari bilan taqdirlandilar.

Universitet Axborot xizmati