“Devonxona” bo‘limi to‘g‘risida nizom
Devonxona va Arxiv bo‘limi Toshkent viloyati Chirchiq davlat pedagogika institutining mustaqil tarkibiy qismi hisoblanadi. Mazkur nizom O‘zbekiston Respublikasi Vazirlar Mahkamasining 1999 yil 12 yanvardagi “Ijro intizomini mustahkamlash chora-tadbirlari to‘g‘risida”gi №12-sonli hamda 1999 yil 29 martdagi 140-son Qarorlari, O‘zbekiston Respublikasi bosh vazirining 2009 yil 28 avgustdagi 11-10-sonli topshirig‘i, Oliy va o‘rta maxsus ta’lim vazirining 2010 yil 21 sentabrdagi 195-sonli bo‘yrug‘i asosida tayyorlandi. Ushbu nizom bo‘lim faoliyati maqsadi, vazifalari, funksiyalari, huquqlari va mas’uliyatlarini belgilab beradi.
Bo‘lim o‘z faoliyatida O‘zbekiston Respublikasining “Ta’lim to‘g‘risidagi qonuni”, “Kadrlar tayyorlash milliy dasturi”, Oliy ta’lim to‘g‘risidagi Nizom va institut nizomiga, shuningdek Mehnat Qonunchiligi, institut rektori buyruklari, ko‘rsatmalari va mazkur nizomga amal qiladi.
Bo‘limning vazifalari
Devonxonaga kelib tushadigan farmonlar, qarorlar, buyruqlar, xatlar va boshqa hujjatlarni belgilangan tartibda qabul qilish, rasmiylashtirish va institut rahbariyatiga, shuningdek, institut tarkibiy qismlariga yetkazish.
Hujjatlarni belgilangan muddatlarda ijrochilarga taqdim etish va nazorat qilish, monitoring bo‘limiga axborot berish.
Fakul’tetlarda hujjatlar yig‘ma jildi va keluvchi, chiquvchi hujjatlarning ro‘yxatga olish ahvolini o‘rganish va yil yakuni bo‘yicha rahbariyatga ma’lumot tayyorlash.
“Ma’lumotlar to‘plami” tashkil etish, yuqori tashkilotlar va fuqarolardan kelgan murojaatlarni saqlashni ta’minlash.
Rahbariyat tomonidan berilgan ko‘rsatmalar, farmoyishlar va buyruqlarning ijrosini ta’minlash, hujjatlarning sifatiga mas’ul bo‘lish.
Ariza, shikoyat, taklif va so‘rovnomalarni tahlil qilib, rahbariyat va bo‘limlarga yetkazish va bajarilishini nazorat qilish.
Huquq va majburiyatlar
Devonxona quyidagilarni amalga oshirish huquqiga ega:
Institutga kelib tushayotgan hujjatlar va axborot materiallarini tanishib chiqish va ishda qo‘llash uchun olish.
Moddiy-texnik bazadan oqilona foydalanish.
Me’yoriy-huquqiy hujjatlar talablariga amal qilish.
Institut rahbarlari va bo‘lim boshliqlaridan kamchilik bilan tayyorlangan hujjatlarni rasmiylashtirishni talab qilish va bekor qilish.
Hujjatlarning davlat tilida tayyorlanishini ta’minlash.
Boshqaruv
“Devonxona” bo‘limi rektorga bo‘ysunadi, bo‘lim ish faoliyatini bo‘lim mudiri boshqaradi. Mudir rektor buyrug‘i bilan tayinlanadi va ishdan ozod qilinadi. Mudir lavozimiga oliy ma’lumotli va kamida 3 yillik ish stajiga ega shaxslar tayinlanadi.
Yakuniy qoidalar
Ushbu Nizom institut Kengashida qabul qilingan kundan kuchga kiradi.
Nizomga o‘zgartirish va qo‘shimchalar institut Kengashining yig‘ilishida qabul qilinadi.
O‘zgartirishlar kiritish uchun devonxona mudiri va institut tashabbus ko‘rsatish huquqiga ega.
Devonxona va arxiv bo’limi mudiri
