Ilmiy-tadqiqot faoliyatiga doir muloqotlar bo‘lib o‘tmoqda

Chirchiq davlat pedagogika universiteti fakultetlarida professor-o‘qituvchilar, tayanch doktorantlar, doktorantlar, stajyor-tadqiqotchilar va mustaqil izlanuvchilar ishtirokida ilmiy-tadqiqot faoliyatiga oid uchrashuvlar bo‘lib o‘tmoqda.

Ilmiy ishlar va innovatsiyalar bo‘yicha prorektor Baxodir Eshchanov rahbarligida professor-o‘qituvchilarning ilmiy salohiyatini oshirishga qaratilgan ochiq muloqotlarda universitetda ilmiy faoliyat olib borish uchun yaratilgan imkoniyatlar to‘g‘risida batafsil ma’lumot berildi. U, shuningdek, ilmiy stajirovkalarda ishtirok etish, xalqaro ma’lumotlar bazalari va undagi nufuzli ilmiy jurnallarda maqolalar chop etish tartiblari xususida to‘xtalib o‘tdi. Ilmiy darajaga ega bo‘lmagan professor-o‘qituvchilarning ilmiy-tadqiqot ishlari holati tahlil qilindi.

Ilmiy -tadqiqot, innovatsiyalar va ilmiy-pedagogik kadrlar tayyorlash boʼlimi mas’ullari tadqiqotchilarga yakka tartibli ish rejasini shakllantirish, yil yakuni bo‘yicha monitoringdan o‘tish tartibi tushuntirildi. Foydalanish imkoniyati mavjud bo‘lgan elektron resurslar hamda mazkur resurslardan to‘g‘ri foydalanish bo‘yicha ham ma'lumot berildi.

Uchrashuvlarda, shuningdek, 250 nafardan ziyod tadqiqotchilar ishtirok etib, ular o‘zlarini qiziqtirgan savollariga batafsil javob olishdi. Shu bilan bir qatorda innovatsion loyihalar samaradorligini oshirish hamda xalqaro hamkorlikni kengaytirish bo‘yicha taklif va tavsiyalar bildirildi. Kafedralarning ilmiy salohiyati va mavjud muammolar tahlil qilinib, ularni bartaraf etish yuzasidan aniq vazifalar belgilandi, kafedralarda amalga oshiriladigan ishlar kelishib olindi va istiqbolli rejalar tasdiqlandi.

Bu uchrashuvlar Chirchiq davlat pedagogika universitetining ilmiy tadqiqotlar sohasidagi samaradorligini oshirishga qaratilgan keng ko‘lamli ishlar doirasining muhim qismi sifatida alohida ahamiyatga ega. Professor-o‘qituvchilar va tadqiqotchilar ilmiy faoliyatni rivojlantirish borasidagi yangi imkoniyatlar hamda ilmiy tadqiqot ishlarini yanada samarali tashkil etish uchun kerakli ma’lumotlarga ega bo‘lishdi.

Universitet Axborot xizmati