Innovatsion taʼlim muhitida filologik va pedagogik tadqiqotlar integratsiyasi

     Chirchiq davlat pedagogika universitetida 13-14 aprel kunlari “Innovatsion taʼlim muhitida filologik va pedagogik tadqiqotlar integratsiyasi” mavzusida xalqaro ilmiy-amaliy konferensiya bo‘lib o‘tdi.

     Mazkur xalqaro ilmiy-amaliy konferensiya zamonaviy ta’limning transformatsiyasini aks ettiruvchi dolzarb ilmiy yondashuvlarni muhokama qilishga bag‘ishlandi. Asosiy e’tibor filologik va pedagogik tadqiqotlarni integratsiyalashga, raqamli texnologiyalarni joriy etishga, innovatsion o‘qitish metodlarini rivojlantirishga hamda mutaxassislarni tayyorlash uchun moslashuvchan fanlararo modellarni yaratishga qaratildi.

     Ta’lim jarayonini modernizatsiya qilish, kasbiy ta’limda til va adabiyot tadqiqotlarining rolini kuchaytirish, tahliliy fikrlash, interaktivlik va raqamli muloqotga asoslangan yangi pedagogik madaniyatni shakllantirish masalalariga alohida e’tibor berildi.

     Konferensiya Buyuk Britaniya, Kanada, Rossiya, Germaniya, Malayziya, Indoneziya, Qozog‘iston va boshqa davlatlardan olimlar hamda amaliyotchilarni birlashtirdi hamda xalqaro tajriba almashinuvi va global ilmiy muloqotni rivojlantirishga xizmat qildi.

     Konferensiya Indoneziya pedagogika universiteti professori Muhammad Ali tomonidan o‘qilgan asosiy ma’ruza bilan ochildi. Uning chiqishi lingvistik tadqiqotlarni zamonaviy pedagogik amaliyot bilan uyg‘unlashtirishning muhim ahamiyatini yorqin tarzda namoyon etdi.

     Nufuzli ma’ruzachilar qatorida O‘zbekiston Milliy pedagogika universiteti professori Gulnora Mahkamova diskursiv kompetensiyani shakllantirishdagi dolzarb lingvodidaktik muammolarni yoritib, ravon fikrlaydigan va tanqidiy yondasha oladigan o‘quvchilarni tarbiyalash zarurligini ta’kidladi.

     O‘zbekiston davlat jahon tillari universiteti faxriy professori Zulfiya Tuxtaxodjayeva esa korpusga asoslangan metodlar orqali formulaviy tilni o‘qitishning innovatsion yondashuvlarini taqdim etib, zamonaviy lingvistik vositalarning amaliy ahamiyatini ko‘rsatdi.

     Konferensiyaning xalqaro qamrovi AQSh Davlat departamentining ingliz tili dasturi mutaxassisi doktor Juzeppe Kiaramonte ishtiroki bilan yanada boyidi. U pedagoglarni an’anaviy chegaralardan chiqib, o‘zgarishlar tashabbuskori bo‘lishga chaqirdi. Uorvik universiteti doktori Komila Tangirova esa korpus lingvistikasini o‘quv jarayonida qo‘llash bo‘yicha qimmatli fikr-mulohazalarni bildirib, nazariya va amaliyotni uyg‘unlashtirdi.  Yalpi majlis yakunida Timur Pak adabiyotning til o‘rganishdagi muhim o‘rnini alohida ta’kidladi.

     Anjuman ishi 6 ta sho‘’baga bo‘lingan holda olib borildi. Xalqaro konferentsiyada 70 dan ortiq ilmiy ma’ruzalar tinglandi.

     Konferensiya yakuniga ko‘ra ko‘rilgan masalalar va tinglangan ma’ruzalar asosida ilmiy qiymatga ega ma’lumotlar hamda to‘plangan mahalliy va xorijiy tajriba, shuningdek, zamonaviy ta’limning transformatsiyasini tadqiq etish borasida mamlakatimizda olib borilayotgan ishlar keng jamoatchilikka etkazildi. Ishtirokchilar ma’ruzalarini ilmiy to‘plam tarzida nashr etishga kelishib olindi.

     Konferensiyaning xorijlik qatnashchilarini Chirchiq davlat pedagogika universiteti rektori G‘ofurjon Muxamedov qabul qildi va o‘z minnatdorchiligini bildirdi.

Universitet Axborot xizmati