Konstitutsiya — inson qadri, erkinlik, tenglik va adolat garovi

     O‘zbekiston Respublikasi Konstitutsiyasi qabul qilinganining 33 yilligi munosabati bilan Chirchiq davlat pedagogika universitetida “Konstitutsiya — inson qadri, erkinlik, tenglik va adolat garovi” mavzusida ma’naviy-ma’rifiy tadbir bo‘lib o‘tdi.

     Tadbirda universitet rahbariyati, Toshkent viloyati Prokuraturasi vakillari, Xalq deputatlari Chirchiq shahri Kengashi deputatlari, Chirchiq oliy tank komandir-muhandislik bilim yurtida kursantlar, Havo Hujumidan Mudofaa Qo‘shinlari hamda Harbiy Havo Kuchlari Qo‘mondonligiga qarashli 08366-harbiy qism harbiy xizmatchilari, professor-o‘qituvchilar, talaba-yoshlar, soha mutaxassislari hamda jamoatchilik vakillari ishtirok etdi. Unda mamlakatimiz taraqqiyotida Konstitutsiyaning tutgan o‘rni, davlat boshqaruvi, fuqaro huquq va erkinliklarini himoya qilishdagi asosiy tamoyillar, shuningdek, inson qadrini ulug‘lashga qaratilgan islohotlar mazmun-mohiyati atroflicha yoritildi.

     Tadbirni universitet rektori, Xalq deputatlari Toshkent viloyat Kengashi deputati G‘ofurjon Isroilovich Muxamedov kirish so‘zi bilan ochib, Konstitutsiyamizda belgilangan bosh g‘oyalar — qonun ustuvorligi, adolat, inson huquqlarining daxlsizligi, tenglik prinsiplari va demokratik qadriyatlarning amaliy hayotdagi ahamiyati haqida so‘z yuritdi. Ta’kidlanganidek, so‘nggi yillarda amalga oshirilayotgan davlat siyosati ushbu tamoyillarni yana-da mustahkamlashga qaratilgan bo‘lib, ta’lim, iqtisodiyot, ijtimoiy himoya va boshqaruv tizimlarida sezilarli o‘zgarishlarga xizmat qilmoqda.

     Shuningdek, Davlat va huquq instituti bo‘lim boshlig‘i,professor Mirodiljon Baratov va Toshkent viloyati prokuraturasi bo‘limi boshlig‘i, dotsent Muxayo Ashurovalar so‘zga chiqib, yoshlarning huquqiy savodxonligini oshirish, adolat va mas’uliyat tamoyillariga sodiq bo‘lgan yangi avlod kadrlarini tayyorlash muhimligini alohida qayd etdilar.

     Tadbir davomida Konstitutsiya normalari bo‘yicha ilmiy-amaliy chiqishlar, qonunchilikdagi so‘nggi islohotlar tahlili, shuningdek, “Inson qadri — eng oliy qadriyat” tamoyiliga bag‘ishlangan loyihalar taqdim etildi.

Universitet Axborot xizmati