Milliy tafakkur va ma’naviyatimizning ikki buyuk ustuni

     Chirchiq davlat pedagogika universiteti hamda O‘zbekiston kasaba uyushmalari Federatsiyasi Toshkent viloyati Kengashi hamkorligida Alisher Navoiy tavalludining 585 yilligi va Zahiriddin Muhammad Bobur tavalludining 543 yilligi munosabati bilan “Navoiy va Bobur – milliy tafakkur va ma’naviyatimizning ikki buyuk ustuni” mavzusida ma’naviy-ma’rifiy tadbir tashkil etildi.

     Mazkur tadbir milliy adabiyotimiz va boy ma’naviy merosimizni keng targ‘ib qilish, yoshlar qalbida Vatanga muhabbat, tarixga hurmat, ezgulik, adolat hamda yuksak insoniy fazilatlarni mustahkamlash maqsadida o‘tkazildi.

    Tadbirni Chirchiq davlat pedagogika universiteti rektori, fan arbobi G‘ofurjon Muxamedov va O‘zbekiston kasaba uyushmalari Federatsiyasi Toshkent viloyati Kengashi raisi Sayyora Fayziyeva kirish so‘zi bilan ochib, Navoiy hamda Bobur merosini o‘rganish har birimiz uchun ma’naviy mas’uliyat ekanini, ularning asarlarida ilgari surilgan g‘oyalar bugungi kunda ham o‘z dolzarbligini saqlab kelayotganini, mazkur asarlarning yuksak tarbiyaviy ahamiyatga egaligini ta’kidladilar.

     Shundan so‘ng Toshkent davlat o‘zbek tili va adabiyoti universiteti dotsenti Abdimurod Tilovov hamda Chirchiq davlat pedagogika universiteti O‘zbek adabiyotshunosligi kafedrasi mudiri Nodira Xoliqova tomonidan Alisher Navoiy va Zahiriddin Muhammad Boburning hayoti hamda ijodi yuzasidan yig‘ilganlarga batafsil ma’lumot berildi.

     Dastur doirasida mumtoz adabiyot namunalari asosida badiiy chiqishlar namoyish etilib, Navoiy hamda Boburning g‘azal va ruboiylaridan namunalar o‘qildi, kuy-qo‘shiqlar ijro etildi.

     Shuningdek, universitetning bir qator faol talabalari O‘zbekiston kasaba uyushmalari Federatsiyasi Toshkent viloyati Kengashi tomonidan bir yillik “Mutolaa Premium” obunasi hamda esdalik sovg‘alari bilan taqdirlandi.

     Yakunda universitet rahbari hamkorlik uchun O‘zbekiston kasaba uyushmalari Federatsiyasi Toshkent viloyati Kengashi faollariga minnatdorlik bildirib, esdalik sovg‘alarini topshirdi.

Universitet Axborot xizmati