Qatagʻon qurbonlari xotirasi muzeyi

Muzey haqida umumiy ma'lumot

Oʻzbekiston Respublikasi Vazirlar Mahkamasining 2017-yil 22-noyabrdagi “Oʻzbekiston Respublikasi Vazirlar Mahkamasi huzuridagi Qatagʻon qurbonlari xotirasi davlat muzeyi va hududlardagi oliy ta’lim muassasalari tuzilmasida Qatagʻon qurbonlari xotirasi muzeylarini tashkil etish chora-tadbirlari toʻgʻrisida”gi 936-son qarori asosida 2019-yil 18-sentyabr kuni Chirchiq davlat pedagogika universiteti tuzilmasida Qatagʻon qurbonlari xotirasi muzeyi ochildi.

Muzeyning asosiy maqsadi – totalitar tuzum davrida nohaq qatag‘on qilingan yurtdoshlarimizning hayoti, faoliyati va ular qoldirgan boy tarixiy merosni o‘rganish, saqlash va keng jamoatchilikka yetkazishdan iborat.

Muzey ekspozitsiyalari mavzusi va xronologiyasi asosida 8 bo‘limga bo‘lingan. Har bir bo‘limda sovet mustabid tuzumi davrida yuz bergan siyosiy qatag‘onlar, sud hukmlari, surgunlar va boshqa tarixiy voqealar yoritilgan hujjatlar, fotosuratlar va arxiv materiallari asosida tasvirlangan.

2024-yil davomida muzey faoliyati O‘zbekiston Respublikasi Prezidenti va hukumatining tegishli qarorlariga asoslangan holda yanada kengaytirildi. Toshkent, Farg‘ona viloyatlari, shuningdek, Toshkent shahridagi davlat va maxsus arxivlardan yuzlab tarixiy hujjatlar o‘rganildi. Jumladan, 1916-yilgi Turkiston qo‘zg‘oloni, “Paxta ishi” kabi tarixiy voqealar yuzasidan materiallar to‘plandi.

Muzey xodimlari tomonidan arxiv tadqiqotlari, ekspeditsiyalar, ilmiy izlanishlar olib borilib, natijalari asosida “Tarixiy xotira beqiyos I va II” nomli kitoblar chop etilishi va “Toshkent viloyati xotira kitobi”ning I-jildi tayyorlandi.

Muzey nafaqat ilmiy-tadqiqot markazi, balki yoshlar uchun ma’naviy-ma’rifiy tarbiya maskani sifatida ham faoliyat yuritmoqda. Rassomlik tanlovlari, ilmiy-amaliy konferensiyalar va ko‘rgazmalar orqali tarixiy xotirani asrash, qatag‘on qurbonlarining xotirasini abadiylashtirishga xizmat qilmoqda.