Qaynonani «ona»ga, kelinni «qiz»ga «aylantiruvchi» «sehrli» Universitet

     Mamlakatimizda xotin-qizlarni ilmiy faoliyatga keng jalb etish, ularning dasturiy ishlanmalari, innovatsion g'oyalarini qo'llab-quvvatlash masalasiga davlat siyosati darajasida e'tibor qaratilmoqda. Ayol-qizlarning ilm olishi, ularni kasb-hunarga o'qitish hamda bandligini ta'minlash, tadbirkorlikka keng jalb etish ustuvor yo'nalishlardan biriga aylandi.

      Maktabgacha va boshlang‘ich ta’lim fakulteti tashabbusi bilan talaba-kelin va ularning qaynonalari ishtirokida davra suhbati tashkil etildi. Bayram arafasida tashkil etilgan ma’rifiy tadbirda qaynonalar o‘z talaba-kelinlariga, universitet jamoasiga samimiy tilaklarini bildirdi. Talaba-kelinlar ham qaynonalariga "Aziz qaynonam" ramziy nishoni hamda esdalik sovg‘alarini topshirdi.  

     «Qizlarning ilmli bo'lishini rag'batlantirish uzoqni ko'zlab bosilgan muhim qadamdir. Bugungi talaba qiz ertangi kunda o'z sohasining etuk mutaxassisi bo'lishi bilan birga, ilmli, intellektual salohiyatli, keng dunyoqarashga ega farzandni tarbiyalaydigan ona ham bo'ladi. Ma'rifatli ayol o'z sohasida ham, oilada ham kelajakka daxldor to'g'ri qaror qabul qilinishiga munosib hissa qo'shadi», dedi CHDPU xotin-qizlar masalalari bo‘yicha maslahat kengashi raisi, rektor maslahatchisi Gulnora Norqo‘ziyeva.

      Tadbir ishtirokchilari o‘zaro tajriba almashdi. Hurmat va mehr-oqibat ruhida samimiy muloqot oilada talaba-kelinlarning o‘rnini yanada mustahkamlashga xizmat qildi.

Universitet Axborot xizmati