Rektor va Germaniyaning Laybnits- Nemis tili ilmiy-tadqiqot instituti (IDS) professorlari o‘rtasida uchrashuv bo‘lib o‘tdi

     Chirchiq davlat pedagogika universitetida o‘tkazilayotgan xalqaro yozgi maktab doirasida universitet rektori, professor Muxamedov Gafurjan Israilovich hamda Germaniyaning Mannhaym shahridagi Laybnits- Nemis tili ilmiy-tadqiqot instituti (IDS)dan tashrif buyurgan professor-o‘qituvchilar — professor Stefan Engelberg, professor Katarina Dyuk xonim, professor Kristian Lang va professor Roman Shnayder bilan rasmiy uchrashuv bo‘lib o‘tdi.

     Uchrashuv davomida ChDPU va IDS o‘rtasida 2023-yilda yo‘lga qo‘yilgan hamkorlik, shu asosda amalga oshirilgan ilmiy tadbirlar hamda ayni paytda o‘tkazilayotgan xalqaro yozgi maktabning mazmuni va ahamiyati atroflicha muhokama qilindi.

     Tomonlar empirik germanistika yo‘nalishida ilmiy hamkorlikni kengaytirish, yosh olimlar uchun seminar va treninglarni rivojlantirish, IDSning zamonaviy ilmiy resurslaridan samarali foydalanish, shuningdek, akademik almashinuv va ilmiy stajirovkalarni yo‘lga qo‘yish masalalari yuzasidan fikr almashdilar.

     Shuningdek, uchrashuvda xalqaro yozgi maktabni muntazam tashkil etish, qo‘shma ilmiy loyihalar va nashrlarni kengaytirish hamda amaldagi hamkorlik shartnomasini keyingi 5 yilga uzaytirish imkoniyatlari alohida ta’kidlandi.

     Mazkur uchrashuv ChDPU va IDS o‘rtasidagi hamkorlikni yangi bosqichga olib chiqish yo‘lida muhim qadam bo‘ldi.

Universitet Axborot xizmati