“Ta’limda hamkorlik” – ilm va amaliyot uchun mustahkam ko‘prik

     11-fevral kuni Chirchiq davlat pedagogika universiteti Fizika kafedrasi professor-o‘qituvchilari hamda Fizika va astronomiya ta’lim yo‘nalishi talabalari Parkent tumani 18-sonli va Yuqori Chirchiq tumani 1-sonli umumiy o‘rta ta’lim maktablarida “Ta’limda hamkorlik” loyihasi asosida ilmiy-amaliy tadbir tashkil etdi.
Tadbirning asosiy maqsadi – oliy ta’lim va umumiy o‘rta ta’lim tizimi o‘rtasidagi uzviy aloqalarni mustahkamlash, ilmiy yondashuvlarni maktab amaliyotiga joriy etish hamda o‘quvchilarda ilmiy tafakkur, mustaqil fikrlash va ijodkorlik ko‘nikmalarini rivojlantirishdan iborat bo‘ldi.
     Tadbir avvalida so‘z Fizika kafedrasi mudiri, dotsent Azlarxon Tillaboyevga berildi. U o‘z so‘zida “ta’lim klasteri” konsepsiyasining mazmun-mohiyati, universitet–maktab integratsiyasining strategik ahamiyati hamda fizika fanini o‘qitishda innovatsion metodlardan foydalanish zarurati haqida atroflicha fikr bildirdi.
     Shuningdek, “4+2” amaliyot modeli asosida talabalarni real pedagogik muhitga tayyorlash, klaster laboratoriyalari va STEAM yondashuvi orqali nazariya va amaliyotni uyg‘unlashtirish masalalariga alohida to‘xtalib o‘tildi.
     Tadbir davomida fizika fanidan yaratilgan zamonaviy o‘quv-uslubiy qo‘llanmalar maktab jamoasiga topshirildi. Ushbu adabiyotlar laboratoriya mashg‘ulotlarining yangi shakllari, interfaol topshiriqlar, amaliy masalalar va klaster asosidagi dars ishlanmalarini o‘z ichiga olgan bo‘lib, ta’lim sifatini oshirishda muhim metodik manba bo‘lib xizmat qiladi.
     Universitet professor-o‘qituvchilari tomonidan maktab o‘qituvchilari bilan ochiq muloqot tashkil etilib, fizika fanini o‘qitishda innovatsion pedagogik texnologiyalar, STEAM-integratsiya hamda tajribaviy darslarni samarali tashkil etish yuzasidan tavsiyalar berildi.
     Tadbirning eng qiziqarli qismi universitet talabalari tomonidan tayyorlangan amaliy fizika tajribalari namoyishi bo‘ldi. Elektromagnit induksiya, optika, suyuqliklar bosimi, mexanik harakat va tebranishlar mavzulari bo‘yicha jonli tajribalar o‘tkazildi.
     O‘quvchilar tajribalarni bevosita kuzatish va unda ishtirok etish jarayonida ilmiy kuzatuvchanlik, mantiqiy tahlil qilish, xulosa chiqarish va o‘z fikrini asoslab bayon etish ko‘nikmalarini namoyon etdilar. Bu esa ularda fizika faniga nisbatan qiziqishning yanada ortishiga xizmat qildi.
     Tadbir doirasida Chirchiq davlat pedagogika universiteti jamoasi tomonidan Parkent tumani 18-sonli va Yuqori Chirchiq tumani 1-sonli umumiy o‘rta ta’lim maktablariga STEAM tadqiqotlari markazida tayyorlangan fizika fanidan oʻquv laboratoriya jihozlari sovg‘a qilindi.
     Mazkur jihozlar o‘quvchilarning mustaqil tajriba o‘tkazish, muammoli vaziyatlarda yechim topish, ijodiy fikrlash va ilmiy xulosa chiqarish ko‘nikmalarini rivojlantirishga xizmat qiladi.
     Tadbir yakunida talabalar va maktab o‘quvchilari birgalikda yangi qurilmalar asosida laboratoriya mashg‘ulotlarini o‘tkazdilar. O‘quvchilar laboratoriya jihozlari bilan ishlash, xavfsizlik qoidalariga amal qilish hamda natijalarni tahlil qilish jarayonida o‘zlarini haqiqiy “kichik tadqiqotchi” sifatida sinab ko‘rdilar.
     “Ta’limda hamkorlik” loyihasi oliy ta’lim va maktab o‘rtasidagi ilmiy-amaliy integratsiyani mustahkamlash, yosh avlodda ilmiy tafakkur va innovatsion fikrlashni shakllantirishda muhim ahamiyat kasb etmoqda.
     Chirchiq davlat pedagogika universiteti jamoasi kelgusida ham bunday hamkorlik tashabbuslarini izchil davom ettirish, yoshlarni fan va innovatsiyaga yo‘naltirish hamda “universitet – maktab – ilmiy markaz” tizimini yanada mustahkamlashni o‘z oldiga maqsad qilib qo‘ygan.
     Bu kabi loyihalar ta’lim tizimida ilm va amaliyot uyg‘unligini ta’minlab, yoshlarni tahliliy fikrlaydigan, ijodkor va ilmga mehr qo‘ygan shaxs sifatida kamol toptirishga xizmat qiladi.

Universitet Axborot xizmati