I.Tursunov 1969 yil 4 avgustda Namangan viloyati Uchqo‘rg‘on tumanida ziyolilar oilasida tavallud topgan, millati o‘zbek. 1986-1992 yillarda Toshkent Davlat universiteti (hozirgi Mirzo Ulug‘bek nomidagi O‘zbekiston milliy universiteti) Fizika fakultetida tahsil olgan.
1992-1994 yillarda O‘zbekiston Milliy universiteti Fizika fakulteti “Yarimo‘tkazgichlar va dielektriklar fizikasi” kafedpasida stajyor-tadqiqotchi, 1994-1997 yillari shu kafedraning aspiranturasida, 1999-2001 yillari Yarimo‘tkazgichlar va dielektriklar fizikasi kafedpasi doktoranturasida tahsil olgan. 2000-2018 yillari O‘zbekiston milliy universiteti Fizika fakulteti Umumiy fizika kafedrasida dotsent vazifasida faoliyat ko‘rsatgan. 2018-2019 yillari Toshkent viloyati Chirchiq davlat pedagogika instituti Aniq fanlar kafedrasi mudiri vazifasi bajaruvchi, 2020 yildan boshlab Toshkent viloyati Chirchiq davlat pedagogika instituti Fizika va kimyo fakulteti, Fizika kafedrasi mudiri vazifasini bajaruvchisi lavozimlarida faoliyat olib bormoqda.
I.G.Tursunov fizikaning yarimo‘tkazgichlar va dielektriklar sohasida mamlakatimizning yetakchi olimlaridan hisoblanadi. Jumladan, 1998 yilda 01.04.10-yarimo‘tkazgichlar va dielektriklar fizikasi ixtisosligi bo‘yicha “Oltin, nikel va gadoliniy legirlangan kremniydagi deformatsion effektlar” mavzusida nomzodlik dissertatsiyasini, 2018 yilda 01.04.10 - yarimo‘tkazgichlar fizikasi ixtisosligi bo‘yicha “Kompensirlangan kremniy va ular asosidagi sirt - barer diod strukturalarda tenzostimullash xodisalar” mavzusida doktorlik dissertatsiyasini himoya qilgan. O‘zbekiston Respublikasi Oliy Attestatsiya Komissiyasi tomonidan 2008 yilda dotsent ilmiy unvoni berilgan. Ushbu izlanishlari natijasida 6 ta o‘quv qo‘llanma, 2 ta monografiya, 85 dan ortiq ilmiy ishlar, jumladan, 10 ta xorijiy, 20 ta respublika jurnallarida ilmiy maqolalar, 30 ta xorijiy va 40 ta respublika miqyosida o‘tkazilgan konferensiyalarda ilmiy tezislarni chop ettirgan.
I.G.Tursunov dars mashg‘ulotlari va o‘quv jarayonini tashkil etishda pedagogikaning zamonaviy usul va vositalarini qo‘llash ko‘nikmasiga ega malakali mutaxassis hisoblanadi. Buni “Nanotexnologiyalar va nanofizika”, “Umumiy fizika”, “Eksperimental fizika metodlari” kabi fan va o‘quv kurslaridan ma’ruza va amaliy mashg‘ulotlar jarayonida alohida kuzatish mumkin.
