Umrim bayoni
QR kod:
Tabiatning donoligiga tan bermay ilojing yoʼq. Hamma narsaning oʼlchovi bor. Daqiqa-daqiqasiyu soniya-soniyasi oʼlchab qoʼyilgan. Yozda kun uzun, tun qisqa. Qishda kun qisqa, tun uzun. Nega? Doʼppingni tizzangga qoʼyib, chakkangni qashlab, bir oʼylab qarasang buyuk bir hikmatga duch kelasan. Yaʼni, hamma narsa inson uchun, hamma narsa yer yuzida qimirlagan jon uchun ekaniga iqror boʼlasan. Аlloh, bogʼbonning mevasi pishsin, dehqonning ekini koʼproq oftobdan bahramand boʼlsin deb yorugʼ kunni uzaytirib qoʼygan. Qish tunlari juda uzun, tong otishini kutib u yonboshingdan-bu yonboshingga agʼdarilaverasan-agʼdarilaverasan. Hadeganda ufk cheti oqara-qolmaydi. Bunda ne karomat bor? Oʼylaysan-oʼylaysan, yana bir buyuk hikmatga duch kelasan. Milliard-milliard farzandining ogʼziga koʼksini tutgan ona-zamin toliqib, uyquga bosh qoʼygan. Tabiat uning ustiga oppoq koʼrpasini yopib, miriqib uxlab orom ol, deyapti.
