UNIKOM universiteti rektori boshchiligidagi delegatsiya bilan muzokaralar o‘tkazildi

     Kecha, 15-sentabr kuni Chirchiq davlat pedagogika universitetiga Indoneziya Respublikasining UNIKOM universiteti rektori, professor Eddy Soeryanto Soegoto boshchiligidagi Indoneziya Kompyuter universiteti vakillaridan iborat delegatsiya tashrif buyurdi.

     O‘zbekiston va Indoneziya o‘rtasidagi ikki tomonlama diplomatik hamda iqtisodiy munosabatlar bilan bir qatorda, ta’lim borasida ham hamkorlik aloqalari mustahkamlanib bormoqda. Jumladan, Chirchiq davlat pedagogika universitetida Indoneziyaning Pendidikan universiteti bilan ta’limda xalqaro hamkorlikni o‘rnatish borasida memorandum imzolanib, qator maqsadli vazifalar amalga oshirib kelinmoqda.

     Tashrif chog‘ida ChDPU hamda Indoneziya Kompyuter universitetining o‘quv, ilmiy va akademik faoliyati haqida ma’lumot almashildi. Shuningdek, indoneziyalik professor-o‘qituvchilarning universitetimiz akademik jarayonidagi samarali ishtiroki e’tirof etildi.

     Muhokamalar jarayonida magistratura va doktorantura dasturlari bo‘yicha hamkorlik o‘rnatish masalalari muhokama qilindi.

     Muzokaralar yakunida ikki tomonlama bitim va memorandumlar imzolandi.