Bugungi kunda Yangi O‘zbekiston degan ibora xalqimizning ongi va qalbiga chuqur singib ulgurdi. U nafaqat siyosiy-ijtimoiy hayotda, balki ma’naviyat va ta’lim sohasida ham yangi davr boshlanishini anglatadi.
Ta’lim — millat kelajagining poydevori. Shu bois mamlakatimizda oliy va umumiy o‘rta ta’lim tizimini tubdan isloh qilish, uni zamonaviy talablarga moslashtirish davlat siyosati darajasiga ko‘tarildi. Yangi O‘zbekistonda har bir bolaga munosib ta’lim olish huquqi kafolatlangan.
Oliy ta’lim tizimini rivojlantirish konsepsiyasi 2019 yilda qabul qilingan “O‘zbekiston Respublikasi Oliy ta’lim tizimini 2030 yilgacha rivojlantirish konsepsiyasi”da oliy ta’lim sohasining strategik maqsad va ustuvor yo‘nalishlari belgilab berilgan.
Unga ko‘ra:- ta’lim va fan va mahsulot hosiloti o‘rtasida integratsiyani kuchaytirish;- o‘quv rejalari, dasturlar mazmuni amaliyotga yo‘naltirilgan bo‘lishi;- ba’zi yo‘nalishlarda kredit-modul tizimiga o‘tish;
Oliy ta’lim muassasalari soni yil sayin oshib bormoqda, filiallar ochilmoqda, xorijiy tajriba keng joriy etilmoqda. Bugun yigit-qizlarimiz nafaqat yurtimizda, balki jahonning nufuzli universitetlarida ham bilim olish imkoniyatiga ega.
2025-2026 amaliy yildan boshlab, oliy ta’lim bakalavr va magistr darajalari uchun davlat grantlari kiruv choralari belgilab berildi; kiruv kvotalari 2025-2026 dan 2028-2029 yillargacha bosqichma bosqich oshirilishi rejalashtirilgan. Davlat grantlari faqat davlat oliy ta’lim muassasalariga emas, nodavlat va xorijiy oliy ta’lim muassasalari uchun ham belgilanmoqda.
Oliy ta’lim muassasalarining ko‘payishi sifat va nazorat tizimini kuchaytirishni talab qilmoqda. Bu masalani yechish uchun yangi agentlik — Milliy ta’lim sifatini ta’minlash agentligi tashkil etildi. Ushbi agentlik, oliy ta’lim va kasb hunar ta’lim muassasalarida sohaviy va davlat akkreditatsiya, ta’lim programmalarini tashqi baholash tizimi joriy etilishini nazorat qilmoqda. Shu bilan birga, umumiy o‘rta ta’lim maktablari va ixtisoslashtirilgan ta’lim muassasalarida yangi dasturlar, zamonaviy darsliklar, axborot texnologiyalari asosidagi ta’lim tizimi joriy etilmoqda. Bu esa kelajak avlodning mustaqil fikrlaydigan, raqobatbardosh va bilimli bo‘lib voyaga yetishini ta’minlaydi.
Ta’lim sohasida amalga oshirilayotgan islohotlar bir narsani ko‘rsatmoqda: Yangi O‘zbekiston — yangi avlodni tarbiyalayotgan, kelajakka ishonch bilan intilayotgan davlatdir. Milliy g‘oyamiz — ma’rifatli jamiyat qurishdir. Shubhasiz, ta’lim sohasidagi har bir o‘zgarish, har bir yangilik — bu Vatanning yorqin kelajagiga qo‘yilgan mustahkam qadamdir.
Ta’lim sohasidagi o‘zgarishlarning yaqqol namunasini Chirchiq davlat pedagogika universiteti faoliyatida ko‘ramiz. Avval pedagogika instituti sifatida tanilgan bu dargoh, endilikda yangi maqom: Chirchiq davlat pedagogika universiteti sifatida yangi vazifalar va keng imkoniyatlar bilan yurtimiz ta’lim xaritasida munosib o‘rin olmoqda. Yangi maqom — yangi mas’uliyat. Universitet o‘quv dasturlari xalqaro standartlarga moslashtirilmoqda, ish beruvchilar ehtiyojlari inobatga olinmoqda. Bu esa bitiruvchilarning mehnat bozorida raqobatbardosh bo‘lishini ta’minlaydi. Turizm fakulteti, axborot texnologiyalari bo‘limi kabi yo‘nalishlar yoshlarga zamonaviy kasblar eshigini ochmoqda. “Karera kuni” kabi tadbirlar talabalarni ish beruvchilar bilan bog‘lab, ularga o‘z bilim va salohiyatini ko‘rsatish imkonini bermoqda.
Chirchiq davlat pedagogika universiteti o‘z faoliyatida nafaqat milliy, balki xalqaro hamkorliklarga ham katta ahamiyat qaratmoqda. Universitas Pendidikan Indonesia âà Universitas Pendidikan Ganesha bilan o‘rnatilgan munosabatlar doirasida talabalar va ustozlar almashinuvi, qo‘shma tadqiqotlar, innovatsion o‘quv dasturlari amalga oshirilmoqda. Bu hamkorlik Chirchiq talabalari uchun yangi tafakkur, yangi madaniy va ilmiy tajribalar eshigini ochmoqda. Mogilev davlat universiteti bilan birgalikda joriy etilgan “3+1” modeli orqali talabalar ta’limning bir qismini O‘zbekistonda, bir qismini Belarusda o‘qib, ikki diplomga ega bo‘lish imkoniyatiga ega. Shuningdek, “Belarus-O‘zbek innovatsion pedagogika qo‘shma fakulteti”da yuzlab yoshlar ta’lim olish imkoniyatiga ega bo‘ladi.
Hali tashkil etilganiga ko‘p vaqt bo‘lmagan bo‘lsada, shu qisqa davr ichida universitetda juda ko‘p ishlar amalga oshirildi. Yangi fakultetlar, yangi yo‘nalishlar ochildi. Jumladan Turizm fakulteti, shuningdek San’atshunoslik fakultetida qo’shimcha Dizayn: interer hamda libos va gazlamalar yo‘nalishlari ochildi. Bu esa o‘z navbatida universitet yanada o‘z faoliyatini kengaytirib zamon talablariga javob beradigan mutaxassislarni etishtirishga astoydil bel bog‘laganidab dalolat beradi. San’atshunoslik fakultetda maxsus san’at studiyalari, dizayn laboratoriyalari, IT markazlari tashkil etilgan. Bu yerda yoshlar nafaqat mutaxassis sifatida, balki ijodkor, kreativ shaxs sifatida ham kamol topmoqda.
Universitetda yangi talabalar turar joylari qurilib ishga tushurilmoqda, ta’lim binolari modernizatsiyalanmoqda, kitobxona fondlarini raqamlashtirish va yangi adabiy-ilmiy manbalar bilan boyitish kabi ishlar amalga oshirilmoqda. Albatta universitetning asosiy tayanch kuchi, bu unda faoliyat yuritayotgan professor-o‘qituvchilardir. Ularnig ilmiy salohiyati, yangilikka tashnaligi, o‘z ustida tinimsiz ishlab, bilim va malakalarini tinimsiz rivojlantirishi, ta’lim tizimidagi islohotlarni faqat qog‘ozda emas, balki hayotda o‘z natijasini ko‘rsatishiga olib keladi.
Universitetda 2025 yilda “Ko‘p tarmoqli tadqiqot va ta’limning global istiqbollari” mavzusida xalqaro ilmiy amaliy konferensiya tashkil etildi. Unda Turkiya, Indoneziya, Rossiya, Belarus va boshqa davlatlardan olimlar va professor-o‘qituvchilar qatnashdi. Bundan tashqari universitetda “Iqtidorli talabalar” faoliyati yo‘lga qo’yilgan. Unda talabalar olimpiadalarda ishtirok etishi, intellektual va ilmiy-ijodiy loyihalar bajarishi, jumladan, monografiyalar, maqola va tezislar berish kabi faoliyatlar bor. Chirchiq davlat pedagogika universitetida amalga oshirilayotgan islohotlar va xalqaro hamkorliklar Yangi O‘zbekiston ta’lim tizimining kelajak strategiyasini yaqqol namoyon etmoqda. Bu jarayonda yoshlarimiz nafaqat bilim oladi, balki zamonaviy dunyo talablariga javob beradigan raqobatbardosh mutaxassis sifatida kamol topadi.
Shubhasiz, ta’lim sohasidagi har bir yangilik — Yangi O‘zbekistonning taraqqiyot va ma’rifat sari tashlayotgan qadamidir. Chirchiq tajribasi esa bu yo‘lda yorqin namuna bo‘lib xizmat qilmoqda.
“Tasviriy san'at va dizayn”
kafedrasi katta o'qituvchisi
Xalmuxamedova Maxbuba Aslanovna
