Yoshlarda giyohvandlikka qarshi “immunitet”ni shakllantirish shart(mi)?!

     Bugun Chirchiq davlat pedagogika universitetida “Yoshlar kuni” doirasida talabalar orasida giyohvandlik illatini oldini olish, sog‘lom turmush tarzini targ‘ib qilish va huquqiy ongni oshirish maqsadida O'zbekiston Respublikasi Prezidenti Administratsiyasi huzuridagi Narkotiklar va o'qotar qurollarni nazorat qilish agentligi mas’ullari ishtirokida profilaktik suhbat bo‘lib o‘tdi.

     Tadbirni universitet rektori G‘ofurjon Muxamedov ochib, talabalarni sog‘lom turmush tarziga, bilim olishga va maqsadli faoliyatga ruhlantirish zarurligini ta’kidladi. U shuningdek, bunday tadbirlar yoshlar hayotida muhim ahamiyatga ega ekanini qayd etdi.

     Asosiy ma’ruza so‘zini Narkotiklar va o‘qotar qurollarni nazorat qilish agentligi mas'ul xodimi Mirsaid Haydarov olib bordi. U giyohvandlik va psixotrop moddalar oqibatlari, ularning yoshlar hayotiga ta’siri va bunday illatni oldini olish zaruriyati haqida gapirdi. Agentlik xodimi, shuningdek, giyohvandlikka qarshi kurashish bo‘yicha huquqiy choralar va ijtimoiy himoya mexanizmlari haqida ham ma’lumot berdi.

     Respublika ixtisoslashtirilgan ruhiy salomatlik ilmiy-amaliy tibbiyot markazi narkologik bemorlar bilan ishlash bo‘lim mudiri Muqaddas Rustamova giyohvandlik vositalari bilan birga psixotrop va psixofaol moddalarni iste’mol qiluvchi yoshlar soni oshib borayotganligi haqida so‘z yuritdi.

     Tadbir davomida talabalar va ishtirokchilar o‘z savollarini berib, muhokama qildilar, giyohvandlikning salbiy oqibatlarini tushunish va sog‘lom hayot tarzini shakllantirishga oid bilimlarini mustahkamlashdi.

     Ushbu tadbir yakunida talabalar tomonidan sahnalashtirilgan spektakl namoyish etildi.

Universitet Axborot xizmati