ChDPU vakili regenerativ turizm bo‘yicha global forumda ishtirok etdi

2025 yil 3 dekabr kuni Indoneziyaning Bandung shahrida Indoneziya pedagogika universiteti tomonidan “1st Global Forum on Regenerative Tourism” xalqaro ilmiy anjumani bo‘lib o‘tdi. Mazkur forum turizmni tiklovchi, qayta jonlantiruvchi va uzoq muddatli barqaror taraqqiyotga yo‘naltirilgan yangi paradigmani shakllantirishga bag‘ishlangan yirik akademik maydon sifatida e’tirof etiladi.

Chirchiq davlat pedagogika universiteti nomidan ushbu nufuzli tadbirda Fakultetlararo chet tillar kafedrasi dotsenti v.b. Qudratbek Maxmudov “Madaniyatlararo muloqot kompetensiyasi regenerativ turizmning katalizatori sifatida” mavzusida asosiy ma’ruzachi sifatida onlayn ishtirok etdi.

Ma’ruzada regenerativ turizmni rivojlantirish jarayonida nafaqat ekologik va iqtisodiy mexanizmlar, balki shaxslar o‘rtasidagi madaniy hamjihatlik, til kompetensiyasi va o‘zaro hurmatga asoslangan samarali kommunikatsiyaning tutgan o‘rni yoritildi. Q.Sh.Maxmudov talabalarda madaniyatlararo muloqot kompetensiyasini rivojlantirish bo‘yicha ChDPUda olib borilayotgan ishlar misolida bu kompetensiyaning barqaror va mas’uliyatli turizmni shakllantirishdagi ilmiy-amaliy ahamiyatini ochib berdi.

Forum quyidagi asosiy yo‘nalishlarni qamrab oldi:

• regenerativ turizm va barqaror rivojlanish

• turizm ta’limi va sig‘imni kuchaytirish

• iste’molchilar xulqi va sayohat tajribalari

• turizmda texnologiya va raqamli transformatsiya

• gastro-turizm va oziq-ovqat madaniyati

• inqirozlar, favqulodda holatlar va turizmda chidamlilik

• turizm siyosati va boshqaruv

• turizm iqtisodiyoti, menejment va tadbirkorlik

Anjumanda Malayziya, Avstraliya, Indoneziya va boshqa davlatlarning olimlari ishtirok etib, regenerativ turizmning nazariy va amaliy jihatlari bo‘yicha fikr almashdilar. ChDPU vakilining mazkur forumdagi ishtiroki universitetning xalqaro ilmiy hamkorlik va barqaror turizm yo‘nalishidagi sa’y-harakatlarini yanada mustahkamlashga xizmat qiladi.