Integratsion ta’lim muhiti: Maktabgacha va boshlang‘ich ta’lim fakultetida sifatli ta’lim uchun yangi imkoniyatlar

28-fevral kuni rektor G‘ofurjon Muxamedov rahbarligida universitet Kengashining kengaytirilgan sayyor yig'ilishi bo'lib o'tdi. Yig‘ilishda Kengash a’zolari, kafedra mudirlari, yetakchi professor-o‘qituvchilar, bo‘lim rahbarlari ishtirokida Maktabgacha va boshlang‘ich ta’lim fakultetining kasbga yo‘naltirilgan ta’lim muhitida kelajak o‘qituvchilarini tayyorlash tajribasi va istiqbollari muhokama qilindi.

Fakultetlarda har bir talaba o‘zini ro‘yobga chiqarishi uchun shart-sharoit va imkoniyatlarini yuzaga chiqarish maqsadida o‘quv-uslubiy manbalar, didaktik vositalar va materiallar, elektron ta’lim resurslari, baholash metodlari va mezonlarini o‘z ichiga olgan ta’lim muhitini yaratishga qaratilgan tizimli ishlar amalga oshirilmoqda.

Maktabgacha va boshlang‘ich ta’lim fakultetida o‘tkazilgan navbatdagi sayyor yig‘ilish resurs ta’minoti va namoyish (demonstratsion) ko‘rgazmalari orqali "Kelajak o‘qituvchisi" Konsepsiyasiga muvofiq fakultetda yaratilgan ta’lim muhiti muhokamadan o‘tkazildi.

Muhokamalarda fakultet tasarrufidagi kafedralarda kelajak bitiruvchisini malakali va raqobatbardosh mutaxassis sifatida tayyorlashda ta’lim jarayonini qanday tashkil etish kerak va bu borada erishilgan natijalar hamda istiqboldagi maqsadlar tinglandi.

Kafedralarning etakchi professor-o‘qituvchilar va iqtidorli talabalarining taqdimotlarida ilg‘or axborot-ta’lim metodlari, ilmiy tadqiqot va innovatsiyalar, sun’iy intellektdan foydalanish jihatlari, kafedralar qoshidagi zamonaviy markazlar faoliyati ko‘rsatib berildi.