"Jinlar bazmi" repertuarga kirdi

     Chirchiq davlat pedagogika universiteti "Mexr" talaba teatrida “Jinlar bazmi" spektakli Yoshlar bilan ishlash, ma’naviyat va ma’rifat bo‘limi huzuridagi Badiiy kengash a’zolariga taqdim etildi. Spektakl Xurshid Do‘stmuhammadning "Yolg‘iz" nomli asari asosida talabalar teatri rejissyori Muhammadzohid Abduqodirov tamonidan sahnalashtirildi.

     Spektakl badiiy kompozitsiya shaklida bo‘lib, unda o‘zbek adabiyoti va tarixida o‘chmas iz qoldirgan jadidlarning faoliyati, maqsad-muddaolari, ular boshiga tushgan og‘ir kunlar ta’sirchan aks ettirilgan.

     Aslida bir emas, bir necha tom asarlarga, ilmiy ishlarga, yirik tadqiqotlarga mavzu bo‘lgan Abdulla Qodiriyning faoliyatini birgina spektakl orqali qamrab olish g‘oyat mushkul sanaladi. “Jinlar bazmi” spektaklida mavzuni imkon qadar yoshlar uchun tushunarli, ravon, sodda, oddiy tarzda taqdim etishga harakat qilingan.

     Yangi sahna asari namoyishidan so‘ng Badiiy kengash a’zolari tomonidan kerakli tavsiyalar berildi, yangi sahna asari qabul qilindi.

     Aytish kerakki, sahna asarida Abdulla Qodiriy timsolida jadidlarning hayoti, qatag‘on yillari ko‘rsatiladi.

     Shuningdek, voqea asosida adibning ijodidan parcha keltiriladi. Asarda millat ma’naviyati, kelajagi yo‘lida qurbon bo‘lgan Abdulla Qodiriyning hayot yo‘liga, umrining oxirgi iztirobli lahzalariga asosiy e’tibor qaratilgan.

     Spektakl universitet rektori G‘ofurjon Muxamedov va badiiy kengash a’zolari tomonidan muhokama etilib ijobiy baholandi, namoyishga tavsiya etildi.

Universitet Axborot xizmati