Rajabov Oybek Tog‘aymurod o‘g‘li

Ilmiy Faoliyati

Muxamedovning ilmiy ishlari bilan birinchi marta karbamid formaldegid oligomerlarining uch oʻlchamli polimerlashtirish jarayonini sekinlashtirish usullari ishlab chiqilgan. Ilk bor interpolimer komplekslari bazasida retseptura yaratish asoslari ishlab chiqildi va tuproqning agrofizik holatini yaxshilash, multimaterial sifatida keng foydalanish, shuningdek, suv-shamol eroziyasiga barham berish maqsadida MT-1 va MT-2 retsepturalari yaratildi.

Ushbu kimyoviy moddalar (MT-1 va MT-2) bir qancha muhim sohalarda qoʻllanilgan:

• Paxtachilikda: Yerda qatqaloq paydo boʻlishining oldini olishda.
• Qishloq va suv xoʻjaligida: Sugʻorishga moʻljallangan suvni 30% gacha tejashda.
• Orol boʻyida: Flora va faunani tiklash hamda shamol eroziyasini toʻxtatishda.
• Chernobilda: AES falokatidan keyin qum va chang hamda radionuklidlarning tarqalishi va bir joydan boshqasiga koʻchib yurishining oldini olishda.

Mazkur tadbiqlar Moskva davlat universiteti hamda Oʻzbekiston Respublikasidagi oliy taʼlim muassasalari ishtirokida amalga oshirilgan.

Bundan tashqari, Muxamedovning PKG-1 polikompleks kompozitlarini qoʻllashga tavsiya etilgan ilmiy asoslangan yondashuvi dori-darmon vositalarining muddatini uzaytirish va taʼsirini kengaytirishga xizmat qilib kelmoqda.

Muxamedov tomonidan 4 ta monografiya, respublika va xorijiy jurnallarda 250 dan ortiq ilmiy maqolalar eʼlon qilingan. Kimyo sohasidagi ixtirolari va kashfiyotlari uchun 10 ta mualliflik guvohnomasiga ega. Uning ilmiy rahbarligida 5 nafar fan doktori va 12 nafar fan nomzodi tayyorlangan.

Pedagogik Faoliyati va Rahbarlik Lavozimlari

Muxamedov faol jamoatchi va tashkilotchi sifatida katta tajribaga ega. Uning pedagogik va rahbarlik faoliyati bir qancha muassasalarni qamrab oladi:

• 1976-1997-yillarda: Toshkent irrigatsiya va qishloq xoʻjaligini mexanizatsiyalashtirish muhandislari institutida katta oʻqituvchi, dotsent, professor lavozimlarida faoliyat olib bordi. 1983-yildan 1997-yilgacha "Umumiy fizika va kimyo" kafedrasi mudiri boʻlib ishladi. Uning kafedraga mudirligi davrida 10 nafar fan nomzodi va 3 nafar fan doktori dissertatsiyalari himoya qilingan.
• 1997-2005-yillarda: Jizzax davlat pedagogika instituti rektori sifatida faoliyat olib borgan davrda institut oʻquv jarayoni tubdan yaxshilandi. Dars mashgʻulotlari ikki smenali tartibdan bir smenaga oʻtkazildi. Qabul kvotalari oshdi va talabalar kontingenti koʻpaydi. Institutning moddiy-texnik bazasi mustahkamlandi va ilmiy salohiyati koʻtarildi, jamoada sogʻlom muhit shakllantirildi.
• 2005-2006-yillarda: Nizomiy nomidagi Toshkent davlat pedagogika universiteti rektori lavozimida faoliyat koʻrsatdi. Bu davrda institutda umumtaʼlim standartlari, yangi avlod oʻquv dasturi va rejalari ishlab chiqildi, elektron darsliklar yaratildi. Oʻquv jarayoniga zamonaviy pedagogik texnologiyalarni keng joriy etish anʼanasi yoʻlga qoʻyildi.
• 2006-2015-yillarda: Mirzo Ulugʻbek nomidagi Oʻzbekiston Milliy universiteti rektori lavozimida faoliyat koʻrsatib, mamlakat oliy taʼlim tizimining rivojiga oʻzining munosib hissasini qoʻshdi. U rektor sifatida universitet tarkibiy tuzilmasini takomillashtirish, oʻquv jarayoni samaradorligini yanada oshirish, xorijiy davlatlarning oliy taʼlim muassasalarida tajriba oshirgan malakali mutaxassislar va pedagog kadrlarni jalb etish, tadqiqotchilar uchun sharoit yaratish tizimini yaratdi.
• 2015-yildan hozirgi kungacha: Toshkent viloyati Chirchiq davlat pedagogika instituti (hozirgi Chirchiq davlat pedagogika universiteti) rektori sifatidagi faoliyatini oʻquv, taʼlim va tarbiya jarayonini mustahkamlash, sogʻlom maʼnaviy dunyoqarashga ega boʻlgan jamoani shakllantirish, shuningdek Toshkent viloyatining pedagog kadrlarga boʻlgan ehtiyojini qondirishning maqsadli va tizimli asoslarini yaratishdan boshladi.

Uning tashabbusi bilan institutda elektron taʼlim tizimi yoʻlga qoʻyildi. Ushbu tizim boʻyicha professor-oʻqituvchilarga dars ishlanmalarini tayyorlashda metodik koʻrsatmalar berish, interaktiv metodlarni oʻzlashtirish, dars ishlanmalari va boshqa oʻquv uslubiy materiallarni kiritish, baholash tartibini joriy etish va talabalar amaliyotini elektron tizimi orqali olib borish va nazorat qilish boʻyicha mutaxassislar tomonidan seminar-treninglar tashkil qilindi.

2018-yilda institut professor-oʻqituvchilari tomonidan Toshkent viloyatidagi maktabgacha, maktab va oʻrta maxsus taʼlim muassasalari uchun pedagog kadrlar tayyorlash hamda oʻquv-metodik rahbarlikni amalga oshirish va shu bilan birga kadrlarga boʻlgan ehtiyojni oʻrganish maqsadida viloyatning bir qator shahar va tumanlari taʼlim muassasalari xodimlari hamda tarbiyachilari hamkorligida “Zamonaviy pedagog imidji va kompetentsiyasi”, “Taʼlim boshqaruvining samarali yoʻllari”, “Pedagoglarga qoʻyiladigan zamonaviy talablar” maktablari tashkil etildi. Shuningdek, Toshkent viloyatida joylashgan 22 ta umumtaʼlim maktablarida «Maktab-laboratoriya» innovatsion tajriba maydonchalari tashkil qilindi. “Maktab-laboratoriya”larda yosh pedagog kadrlarning shaxsiy kasb mahoratini yuksaltirish va rivojlantirish, pedagogikaga moyilligi boʻlgan oʻquvchilarni kasbga yoʻnaltirish va tanlab olish, pedagoglarning shaxsiy-kasbiy mahoratlarini yuksaltiruvchi fan va taʼlim fazosini yaratish, maslahatlar berish, ijodiy tashabbuslarini metodik va tashkiliy qoʻllab-quvvatlash, pedagog kadrlarning salohiyatini yanada oshirish imkoni yaratildi.

2019-yilda G.Muxamedov tashabbusi bilan Toshkent viloyatidagi maktabgacha, maktab va oʻrta maxsus taʼlim muassasalari uchun pedagog kadrlar tayyorlash, pedagogika sohasidagi talab va ilgʻor xorijiy tajribani hisobga olgan holda davlat taʼlim standartlari, oʻquv reja va dasturlarini tizimli ravishda takomillashtirishni amalga oshirish, pedagogika sohasida fundamental, amaliy va innovatsion ilmiy izlanishlar olib borish, taʼlim muassasalari ilmiy-pedagogik salohiyatini oshirish, taʼlim va tarbiya uygʻunligini taʼminlash maqsadida taʼlim subʼektlari ishtirokida “Pedagogik taʼlim innovatsion klasteri” tizimi yaratildi va uni joriy etish boʻyicha keng koʻlamli ishlar amalga oshirilmoqda. Bu borada “2019-2021-yillarga moʻljallangan Toshkent viloyatida Pedagogik taʼlimni rivojlantirish Kontseptsiyasi” ishlab chiqildi.

Bugungi kunda G.Muxamedov gʻoyasi asosida Chirchiq davlat pedagogika universitetining ustuvor ilmiy-uslubiy yoʻnalishi qilib belgilangan “Pedagogik taʼlim innovatsion klasteri” doirasida mazkur taʼlim makonida faoliyat yuritilayotgan 3 ta Ilmiy Kengashlarda 30 ga yaqin doktorlik dissertatsiyalari himoya qilindi. Bu olimlar bugunda Respublikamizdagi turli oliy taʼlim muassasalarida faoliyat yuritayotganligini Ilmiy Kengashlarning amaliy natijadorligi, ilmiy salohiyatning yuksalishiga qoʻshayotgan hissasi sifatida baholash mumkin.

G.I.Muxamedov talaba-yoshlarning isteʼdodi, intilishi va qiziqishlarini doimo nazarda tutadigan va munosib ragʻbatlantiradigan rahbar hisoblanadi. Shuning uchun institut yoshlari orasida tez fursat ichida fan, sanʼat va sport sohasida yuqori natijalarga erishganlar soni koʻpaydi. Ayniqsa, Oʻzbekiston Respublikasi Prezidenti tomonidan ilgari surilgan 5 tashabbusni amalga oshirish boʻyicha tizimni yaratdi va koʻplab loyiha, tanlovlarni shaxsan qoʻllab-quvvatladi. Jumladan, “Kitobxonlik madaniyati”ni oshirish yuzasidan “Bir oyda 10 kitob bilan, bir yilda 100 kitob bilan doʻstlashdim” shiori ostida kitobxonlik tanlovi loyihasi ishlab chiqildi. Ushbu tanlov anʼanaviy tarzda davom ettirib kelinmoqda.

G.I.Muxamedov rahbarligida institutning xalqaro hamkorligini yanada rivojlantirish va ilgʻor xorijiy taʼlim markazlari va tashkilotlari bilan taʼlim, ilmiy va innovatsion tadqiqotlar doirasida tajriba almashish maqsadida muayyan ishlar amalga oshirilmoqda. Xususan, 2018-yilda Rossiya Federatsiyasining A.S.Pushkin nomidagi Leningrad davlat universiteti, Qozogʻiston Respublikasining Janubiy Qozogʻiston pedagogika universiteti, Qozogʻiston Xalqlar doʻstligi injener-pedagogika universiteti, Mintaqaviy ijtimoiy-innovatsion universiteti, Muxtor Avezov nomidagi Janubiy Qozogʻiston davlat universiteti, 2019-yilda A.S.Pushkin nomidagi Rus tili davlat instituti, Chimkent universiteti hamda Tojikiston Respublikasining Tojikiston pedagogika instituti bilan hamkorlik aloqalari oʻrnatilgan.

G.I.Muxamedovning institut rektori sifatidagi keng koʻlamli ishlari taʼlim sifatini oshirish, mamlakatimiz ilm-fani ravnaqiga xizmat qiluvchi bilimli, intellektual rivojlangan kadrlarni tayyorlash hamda Toshkent viloyati taʼlim muassasalarining malakali kadrlarga boʻlgan real ehtiyojini taʼminlashga qaratilgan.