Rektor murojaati
Qadrli talabalar, hurmatli ota-onalar, mo‘tabar ustozlar va universitetimiz jamoasi!
Bugungi tezkor va murakkab zamonda yoshlarimizning ongiga, qalbiga tahdid solayotgan eng xavfli illatlardan biri – bu giyohvandlik balosidir. Afsuski, bu jinoyat va illat jamiyatning turli qatlamlariga singib borishga urinmoqda. Bizning asosiy vazifamiz — yoshlarni bu balodan asrash, ularni to‘g‘ri hayot yo‘liga yetaklash, ertangi kun uchun mas’uliyat hissini kuchaytirishdir.
Aziz talabalar!
Siz — yurtimizning ertangi kuni, jamiyatning eng faol va kuchli qanotisiz. Sizning sog‘lig‘ingiz, ma’naviyati-yu, kelajagingiz biz uchun bebaho qadriyatdir. Bu baloga “qiziqish” yoki “sinab ko‘rish” oqibatida butun umr afsus-nadomatga aylanib qolishi mumkinligini hech qachon unutmang.
Giyohvand moddalar – bu hayotning mazmunini o‘g‘irlaydigan, orzu va maqsadlarni yemiradigan zahardir. O‘zingizni, oilangizni, kelajagingizni asrang!
Muhtaram ustozlar!
Universitetimizda har bir dars, har bir tarbiyaviy suhbat, har bir uchrashuv orqali yoshlarning ma’naviy olamini to‘g‘ri shakllantirish sizning ulkan mehnatingiz va fidoyiligingizga tayanadi. Talabalarni hayotga tayyorlashda, ularni zararli odatlardan ogoh etishda sizning rolingiz beqiyos. Har bir talabaning taqdiri biz uchun mas’uliyatdir — uni birgalikda asraylik.
Hurmatli ota-onalar!
Farzandlarimizning tarbiyasi va ruhiy holati bilan doimiy qiziqib, ularni tinglab, qo‘llab-quvvatlab borish — eng muhim vazifamizdir. Ular bilan ochiq suhbatlar qiling, ishonchli muhit yarating. Mehr va e’tibor — ko‘plab muammolarning oldini oladi.
Bugun biz bir jamoamiz. Maqsadimiz bir — yoshlarimizni sog‘lom, ma’rifatli, ongli va mas’uliyatli qilib tarbiyalash. Giyohvandlikka qarshi murosasiz bo‘laylik! Narkojinoyatchilikka qarshi kurashda faollik ko‘rsatib, huquqni muhofaza qilish organlari bilan yaqindan hamkorlik qilaylik.
Unutmang, Chirchiq davlat pedagogika universitetining har bir talabasi — bizning farzandimiz! Ularning har biri sog‘lom hayot tarzini tanlashi, ertangi kunni yorqin qilishga intilishi bizning hamjihat sa’y-harakatlarimizga bog‘liq.
Keling birlashaylik! Sog‘lom ta’lim muhitini yaratish va yoshlarni zararlı illatlardan asrash yo‘lida birga harakat qilaylik.
O‘zbekistonning ertangi porloq kelajagi — bugungi ogohligimizdadir!
Hurmat bilan,
Chirchiq davlat pedagogika universiteti rektori G‘ofurjon Isroilovich Muxamedov