Sultanova Dilnura Abdurashidovna pedagogik faoliyatini 2012 yildan boshlab olib boradi.
Mehnat faoliyatini Toshkent shahar Yakkasaroy tumanidagi “Nihol” nomli 358-DMTT da tarbiyachi sifatida boshlagan. 2022- yildan boshlab Chirchiq davlar pedagogika universiteti Menejment kafedrasida o'qituvchi sifatida faoliyat yuritmoqda. O'quv jarayonida (maktab menejmenti, ta'lim menejmentini o'qitish metodikasi, strategik menejment, makroiqtisodiyot, sifat menejmenti) fanlaridan ma'ruza va amaliy mashg'ulotlar olib boradi, talabalarning mustaqil ta'lim faoliyatini tashkil qiladi hamda ularning ilmiy-amaliy ishlariga rahbarlik qiladi. Shu davr mobaynida 8 nafar “Maktab menejmenti” yo'nalishi talabalarining bitiruv malakaviy ishlariga rahbarlik qilgan. Ish faoliyati davomida Sultanova Dilnura Abdurashidovna kafedra va fakultet miqyosida o'quv-uslubiy ishlar, ilmiy tadqiqotlar, konferensiya va seminarlarda faol ishtirok etadi. Shuningdek, talabalarning kasbiy ko'nikmalarini rivojlantirish maqsadida turli loyihalar va innovatsion dasturlarda ham ishtirok etgan.
Sultanova Dilnura Abdurashidovnaning ilmiy izlanishlari asosan ta’lim jarayonida loyihalash kompetensiyalarini rivojlantirish masalalariga qaratilgan. Uning tadqiqotlari zamonaviy ta’limda talabalarning mustaqil fikrlashi, ijodiy yondashishi va muammolarni yechish ko‘nikmalarini shakllantirishda loyihalash usullarini samarali qo‘llash imkoniyatlarini o‘rganishga asoslangan. Tadqiqotlarida asosiy e’tibor ta’lim klasterlari sharoitida talabalarning loyihalash kompetensiyasini shakllantirish, pedagogik jarayonda integratsiyalashgan va innovatsion texnologiyalardan foydalanish, hamkorlikda o‘qitish modellarini joriy etish masalalariga qaratilgan. Tadqiqot ishi yuzasidan mahalliy va xalqaro ilmiy jurnallarda loyihalash metodikasi, ta’limda kompetensiyaviy yondashuv va pedagogik innovatsiyalar mavzusida maqolalar chop etgan. Shuningdek, respublika va xalqaro miqyosidagi konferensiyalarda ma’ruzalar bilan ishtirok etib, ilmiy hamkorlik loyihalarida faol qatnashgan.
Sultanova Dilnura Abdurashidovna ta’lim jarayoni samaradorligini oshirish maqsadida bir qator o‘quv-metodik materiallar va qo‘llanmalar muallifi hisoblanadi. U tomonidan tayyorlangan o‘quv-metodik ishlar o‘quv jarayonida talabalarning nazariy bilimlarini mustahkamlash va amaliy ko‘nikmalarini rivojlantirishga xizmat qiladi. “Marketing asoslari” fanidan darslik, “Ta’lim menejmenti”, “Pedagogik menejment”, “Pedagogik texnologiya” fanlaridan o‘quv qo‘llanmalar shuningdek, zamonaviy ta’lim talablariga muvofiq elektron o‘quv resurslari, prezentatsiyalar va test bazalarini yaratgan. Muallif tomonidan tayyorlangan materiallar nafaqat talabalar, balki o‘qituvchilar uchun ham amaliy ahamiyatga ega bo‘lib, ta’lim jarayonida innovatsion va interaktiv metodlardan samarali foydalanish imkonini beradi.
