Vazir CHDPU talabalari bilan uchrashdi

     Bugun Maktabgacha va maktab ta’limi vaziri E’zoza Karimova Chirchiq davlat pedagogika universitetida bo‘lib, talaba yoshlar bilan muloqot qildi.
     Dastlab universitetni rivojlantirish strategiyasi, pedagogik ta’lim sohasida amalga oshirilayotgan loyihalar va istiqbolli rejalar taqdimotiga alohida e’tibor qaratdi. "HAPPYLAB" nomli modulli maktabgacha ta’lim, "Kross-sektor" talabalar tashabbuslari hamda ochiq osmon ostidagi EKO laboratoriyalar faoliyati bilan ham tanishdi.
     Tashrif davomida “Vazir va yoshlar” uchrashuvi o‘tkazildi. Unda Maktabgacha va maktab ta’limi vaziri E’zoza Karimova universitet yoshlarining muammo, taklif va masalalariga quloq tutdi. Samimiy ruhda kechgan uchrashuvda maktab va bog‘chalarda pedagog-talabalar uchun yaratilgan qulaylik va imkoniyatlar yuzasidan murojaatlar tinglandi.
     “Chirchiq davlat pedagogika universiteti haqida shuni aytishim mumkinki, kadrlar tayyorlash jarayoni mutaxassislar kim va nima uchun tayyorlanayotganini yaxshi tushungan holda tashkil qilingan. Va eng asosiysi, bu universitetda men talabalarning yonib turgan ko‘zlarini ko‘rdim”, — dedi vazir.
     Uchrashuv yakunida bir guruh faol, iqtidorli talaba yoshlar pul mukofotlari hamda qimmatbaho sovg‘alar bilan taqdirlandi.
     Maktabgacha va maktab ta’limi vaziri E’zoza Karimovaga Chirchiq davlat pedagogika universiteti rektori G‘ofurjon Muxamedov hamrohlik qildi.

Universitet Axborot xizmati