Zamonaviy ta’lim tizimi oldida faqat bilim berish emas, balki yosh avlodning estetik didi, ijodiy tafakkuri va shaxsiy salohiyatini rivojlantirish kabi muhim vazifalar turibdi. Xususan, pedagogik oliy ta’lim muassasalarida bu boradagi amaliy ishlar hayotiy ehtiyojga aylangan. Aynan shu maqsadlar asosida tashkil etilgan Chirchiq davlat pedagogika universiteti huzuridagi “Art Studio” ijodiy markazi bugun talaba-yoshlar va maktab o‘quvchilari uchun samarali integratsion o‘quv-amaliyot maydoniga aylangan.
“Art Studio” - bu oddiy darsxona emas, balki yoshlarning iste’dodi, qiziqishi va ijodiy salohiyatini shakllantiruvchi zamonaviy maskandir. Bu yerda tasviriy san’at, libos dizayni va haykaltaroshlik kabi yo‘nalishlar bo‘yicha mashg‘ulotlar olib boriladi. Talabalar o‘z bilim va ko‘nikmalarini nafaqat o‘zlashtiradi, balki uni boshqalarga — maktab o‘quvchilariga o‘rgatish orqali yanada mustahkamlaydi. Markazda bolalar uchun akvarel, guash, moybo‘yoq va turli grafik materiallardan foydalangan holda darslar tashkil etiladi. O‘quvchilar bu yerda o‘z tasavvurlaridagi go‘zallikni qog‘ozga tushirishni o‘rganishadi. Rasm chizish jarayonida esa ular nafaqat san’at sirlarini, balki sabr-toqat, diqqat-e’tibor, estetik tafakkur va tartibli mehnatni o‘zlashtiradi. Markazning asosiy ustunligi - talaba va o‘quvchi o‘rtasidagi integratsiyani yo‘lga qo‘ygan amaliyotdir. “Talaba - talabaga ustoz, talaba talabaga - shogird” tamoyiliga asoslangan “O‘rgatib, o‘rganamiz” loyihasi orqali talabalar o‘z bilimini maktab o‘quvchilariga yetkazadi. Bu esa ikki tomonlama o‘sishga xizmat qiladi: o‘quvchilar tasviriy san’at sirlariga oshno bo‘lsa, talabalar esa pedagogik va kasbiy ko‘nikmalarini boyitib boradi.
“Art Studio” tasviriy san’atga qiziqqan maktab o‘quvchilari, havaskor yoshlar va hatto katta yoshdagi havaskor rassomlarni ham qamrab olgan bo‘lib, ularning bo‘sh vaqtlarni mazmunli tashkil etish, kasbga yo‘naltirish va hayotiy qiziqishlarni shakllantirishni maqsad qilib olgan. Bolalar tabiat manzaralari, hayvonot olami, ertak va adabiyot qahramonlari obrazini yaratish orqali dunyoqarashini kengaytiradi. Amaliy mashg‘ulotlar rangtasvir, qalamtasvir va grafika kabi yo‘nalishlarda olib boriladi. Bu esa ijodiy tafakkur doirasini kengaytirib, yangi g‘oyalarni yuzaga keltiradi. Markazning faoliyati klaster tizimiga asoslangan bo‘lib, u pedagog–talaba–o‘quvchi uchligini badiiy muloqot va integratsion hamkorlikda uyg‘unlashtiradi. Talabalar maktablarda mahorat darslari va ko‘rgazmalar o‘tkazadi, shuningdek, o‘zlari rahbarlik qiladigan mini-to‘garaklar faoliyati orqali pedagogik mahoratini amaliyotda sinab ko‘radi. “Art Studio” ijodiy va ilmiy-amaliy markaz sifatida ham faoliyat yuritmoqda. Tadqiqot jarayonlarida san’atshunoslik sohasidagi dolzarb muammolar tahlil qilinadi, fanlararo tadqiqotlar, loyihalar hamda tanlovlar amalga oshiriladi.
Bugungi kunda bu markaz san’at orqali tarbiya, ta’lim, kasbga yo‘naltirish va shaxsiy rivojlanishning kuchli vositasi sifatida o‘z o‘rnini topgan. Shunday ekan, san’atga oshno qalblar, iste’dodli yoshlar va fidoyi ustozlar uchrashadigan bu ijod maskani yorqin kelajak uchun poydevor vazifasini o‘tamoqda desak mubolag‘a bo‘lmaydi.
Imomatova Umida Mirpulatovna “Tasviriy san'at va dizayn” kafedrasi o'qituvchisi
