Jamoamizda maqtovga loyiq o‘qituvchilar ko‘p. Barchasi o‘z ishining fidoyisi, bilimli ustozlar. Har biri ta’lim sohasi va yosh avlodni tarbiyalash yo‘lida umrini bag‘ishlashga hozirlik ko‘rayotgan bo‘lajak pedagoglar uchun o‘zida bor ilm-u ziyoni ulashayotgan bag‘rikeng insonlardir. Shulardan biri, ajoyib inson, Xalq ta’limi a’lochisi Nafisa Rahmonovani har qancha e’tirof etsak arziydi.
Nafisa opa Rahmonova — oqila ayol, suyukli yor, mehribon ona va qaynona, shuningdek, dono murabbiy sifatida ko‘plarga o‘rnak bo‘lib kelmoqda. Ustoz bilan suhbatlashganingizda, u kishining yuksak salohiyatli va ma’naviyatli inson ekanligini anglaysiz. Qaysi sohadan savol bermang, qanday masalada murojaat etmang, barcha savolingizga javob berishga, yordam berishga oshiqadigan pedagog qiyofasida “Haqiqiy ustoz qanday bo‘lishi kerak?” degan savolingizga ham javob olgandek bo‘lasiz.
Nafisa Rahmonova yosh o‘qituvchilar uchun bir nechta uslubiy qo‘llanma yaratgan. U dars o‘tishning samarali usullari haqida muntazam seminarlar o‘tkazadi. Nafisa opa nafaqat tajribali o‘qituvchi va ustoz, balki shoira va tarjimon hamdir. U o‘z hissiyotlarini she’rlariga sochadi, turk tilidan o‘zbek tiliga va o‘zbek tilidan turk tiliga badiiy asarlarni tarjima qiladi.
Nafisa opaning g‘ayrati va fidokorona mehnati ko‘plarning hayotga qarashlarini, yashash va intilish shijoatini oshiradi. Xastaliklar ustozning irodasini ko‘p bor sinaydi. Qo‘l-oyoqlaridagi kuchli og‘riqlar u kishini kamharakat qilib qo‘yganda ham, o‘qituvchilik kasbini davom ettirdi. “Mening auditoriyaga kirib, doskaga o‘z qo‘lim bilan yangi mavzuni yoza olganim tuzalmas kasallik ustidan qozongan kichik g‘alabamdir,” deb kulib qo‘yganlarida ustozda qanchalik kuch va g‘ayrat, kasbiga mehr va sadoqat, mas’uliyat mujassamligini ko‘ramiz.
Ustozning umr yo‘ldoshi va farzandlari: “Bo‘ldi, endi dam oling, bizga sog‘ligingiz kerak, boshqa ishlamang!” deb ko‘p bora tashvishlanishadi. Ularga javoban Nafisa opaning aytar so‘zi shu: “Qo‘lim qalam tutolmay qolguncha, ko‘zlarim ko‘rmay qolguncha ishlayveraman!”
Ustoz hamkasblariga doim kerakli va asqatadigan o‘gitlarni berib keladi. “Bilimini o‘z o‘quvchilaridan qizg‘angan o‘qituvchi, boyligini muhtojlarga ravo ko‘rmagan xasisga tengdir,” degan gaplarini har doim yodimda saqlayman. Bunday o‘gitlar biz o‘qituvchilarning kasbiy faoliyat yo‘limizda haqiqiy pedagog bo‘lib, o‘quvchilarimiz mehrini qozonishimizda, saviyali, bilimli shogirdlar yetishtirishimizda dasturulamal bo‘ladi.
“Shu dargohga ishga kirib go‘yo ikkinchi umrimni yashayotganga o‘xshayman. Har bir kunim izlanishda, maqola yozish, ilmiy tadqiqot bilan shug‘ullanish, shogirdlarga yo‘l ko‘rsatish, yosh avlodga saboq berish bilan go‘zal,” deydi ustoz ko‘zlarida cheksiz quvonch bilan.
Hozirgi kunda Nafisa opa nafaqada bo‘lsa ham ijod qilishdan to‘xtagani yo‘q. U turk yozuvchisi Namiq Kamolning “Jaloliddin Xorazmshoh” dramasini o‘zbek tiliga tarjima qilgan edi, ushbu tarjima asar 100 tomlik “Jahon adabiyoti durdonalari” to‘plamiga kiritildi. “Ona tili va adabiyot ta’limida didaktik o‘yinlar texnologiyasi” nomli uslubiy qo‘llanmasi ham chop etilib, ko‘plab o‘qituvchilar uchun ko‘makchiga aylanib ulgurdi. Navoiyning “Farhod va Shirin” dostoniga bag‘ishlangan “Tarhi toza doston haqida o‘ylar” deb ataluvchi adabiy monografiyasini o‘qigan inson o‘zi uchun ko‘p narsa oladi.
Mulohazalarim so‘ngida Nafisa opaning ijodidan bir she’rni e’tiboringizga havola qilishni joiz deb topdim:
Qachon kelganingni sezmay qolibman,
Sovuq nafasingdan titradi yurak.
Sochimdagi qirov tashrif qog‘ozing
Ekanin anglamay yashayman halak.
O‘quvchi daftarin eslatar umrim,
Ayrim varaqlari yirtib tashlangan.
Ularning hisobin mendan so‘rama,
Men kuygan, men yongan gulxanlar so‘ngan.
Muhabbat, xiyonat, nafrat, nadomat…
To‘rt so‘zga qul bo‘lib yashamoq og‘ir,
Qolgan varaqlarni o‘qiylik, kelgin!
Sarlavhasi “Umid. Yaxshilik. Mehr”.
Ko‘ngil qurg‘ur sira qarimas ekan,
Ilhom parisiday yozib tashlabdi,
“Keksalik” deb ismingni oxirgi betga,
Yozay desam, qara, joy ham qolmabdi.
Qachon kelganingni sezmay qolibman…
Gulnora NORQO‘ZIYEVA,
CHDPU “O‘zga tilli guruhlarda rus tili va adabiyoti ta’limi metodikasi” kafedrasi katta o‘qituvchisi
