CHDPU pavilioni — kreativ tafakkur taqdimoti sifatida talqin etildi

     Yoshlarning amaliy ko‘nikmalari, zamonaviy kompetensiyalari va kasbiy madaniyatini rivojlantirish, umumiy o‘rta ta’lim o‘quvchilarining kasbga yo‘naltirish jarayoni samaradorlik ko‘rsatkichlarini yanada oshirish orqali mamlakatimizning inson kapitali imkoniyatlarini to‘liq ro‘yobga chiqarish bo‘yicha O‘zbekiston Respublikasi Prezidentining PF-190-sonli Farmoni va PQ-316-sonli qarorida qator vazifalar belgilangan.

     Belgilangan vazifalarni amalga oshirish maqsadida, joriy yilning 8-noyabr kuni Toshkent shahridagi Alfraganus universitetida Ta’limni rivojlantirish respublika ilmiy-metodik markazi tomonidan Uzluksiz ta’lim tizimida STEAM g‘oyalar festivali tashkil etildi.

     “G‘oyadan — innovatsiyaga” shiori ostida tashkil etilgan tadbirda Chirchiq davlat pedagogika universiteti vakillari ham ishtirok etdilar.

     Chirchiq davlat pedagogika universiteti Fizika kafedra tomonidan ishlab chiqarilgan laboratoriya jihozlari festival ishtirokchilarda amaliy tajriba asosida o‘rganish, ijodiy fikrlash va muammoli vaziyatlarda mustaqil qaror qabul qilish ko‘nikmalarini rivojlantirishga xizmat qildi.

     Festival uzluksiz ta’lim tizimining barcha bo‘g‘inlarini qamrab olgan holda, o‘quvchi-yoshlar, pedagoglar, oliygoh vakillari va ilmiy tadqiqotchilar uchun yagona innovatsion maydonga aylandi.

     Festivalning asosiy maqsadi – uzluksiz ta’lim tizimida yaratuvchan, innovatsion va kreativ tafakkurni rivojlantirish, STEAM yondashuvini samarali joriy etish hamda yoshlarning ilmiy va amaliy salohiyatini ro‘yobga chiqarishdir.

     Festivalda, shuningdek, resurslar va modellar taqdimoti ham o‘tkazilib, oliygohlar va metodistlar tomonidan ishlab chiqilgan platformalar, VR/AR vositalari, interfaol metodik yechimlar tanishtirildi.

     Festival yakunida Chirchiq davlat pedagogika universiteti dottsenti Kusharboy Suyarov maxsus sertifikat bilan taqdirlandi.

Universitet Axborot xizmati