Chirchiq davlat pedagogika universiteti rektorining talabalarga murojaati
Muhtaram Prezidentimiz Shavkat Mirziyoyevning joriy yil 24-fevral kuni mamlakat yoshlar bilan ularning tashabbuslarini qo‘llab-quvvatlash bo‘yicha qo‘shimcha imkoniyatlarga bag‘ishlangan muloqoti nafaqat sohadagi islohotlarning mantiqiy davomi, balki yurtimiz yoshlar siyosatida mutlaqo yangi, strategik bosqichni boshlab bergan tarixiy voqelik bo‘ldi.
Unda ilgari surilgan tashabbuslar – ta’lim, kasb-hunar, tadbirkorlik, innovatsiya va volontyorlik yo‘nalishlaridagi aniq va tizimli qarorlar – 22 milliondan ortiq yoshlarimizning, jumladan, Universitetimiz yoshlarining ham ulkan salohiyatini ro‘yobga chiqarishga xizmat qiladi.
Davlatimiz rahbari yoshlar – bu nafaqat demografik ustunlik, balki iqtisodiy, ijtimoiy va ma’naviy taraqqiyotning bosh omili ekanligiga alohida e’tibor qaratdi. Ayniqsa, yoshlarni til va kasb-hunar o‘rganishi, sport bilan shug‘ullanishi, g‘oya, loyiha va startapiga ko‘mak berib, ularni o‘stirishi, ishli va daromadli qilib, birorta yoshni e’tiborsiz qoldirmaslikka yanada katta mas’uliyat bilan yondashib ishlashi lozimligi qayd etdi.
Jamoamiz ushbu ishonch va e’tiborni yuksak mas’uliyat sifatida qabul qiladi. Biz uchun yoshlarning nafaqat kasbiy, balki ma’naviy-estetik tafakkurini shakllantirish, ularni milliy va umuminsoniy qadriyatlarga hurmat ruhida tarbiyalash faoliyatimizning uzviy maqsadi deb hisoblaymiz.
Prezidentimiz tomonidan ilgari surilgan “Kelajak tadbirkori” dasturi, “Yangi avlod tadbirkorlari”, tashabbusi, “Yoshlar biznes inkubatori” markazlari, “O‘sish va rivojlanish (Upshift)” loyihasi, volontyorlik harakati kabilarni keng qo‘llab-quvvatlashga qaratilgan tashabbuslar Universitetimiz oldiga yangi vazifalarni qo‘ydi.
Chirchiq davlat pedagogika universiteti jamoasi ushbu tashabbuslar ijrosini ta’minlashni, shubhasiz, eng ustuvor vazifa etib belgilaydi.
Shu boisdan ham kelgusida talabalarni amaliy loyihalar asosida o‘qitish, kelajak pedagoglar strategiyasini yanada faollashtirish, ta’lim tadbirkorligi yo‘nalishlarini kuchaytirish, dual ta’lim elementlarini keng joriy etish, yosh ijodkor va startap tashabbuskorlarini qo‘llab-quvvatlash bo‘yicha aniq chora-tadbirlar ishlab chiqish va amalga oshirishni reja qildik.
Endilikda bu ishlarning ham salmog‘ini oshirish, shuningdek, Toshkent viloyati maktablarida fan olimpiadalari, universitetda sport musobaqalarini yanada ko‘paytirish borasida ish olib boramiz.
Bitiruvchilarni ish bilan ta’minlash borasida ham maqsadli Dasturlarimiz bor. O‘z navbatida bitiruvchilarimizning professional faoliyatda o‘z o‘rinlarini topib kelayotganini ham e’tirof etish joiz.
Hurmatli Prezidentimiz tomonidan amalga oshirilayotgan keng ko‘lamli islohotlar ta’lim va pedagogika sohasida ham yangicha fikrlash, zamonaviy boshqaruv usullarini joriy etish hamda natijadorlikni ustuvor mezon sifatida belgilash zarurligini ko‘rsatmoqda.
Negaki, oliy ta’lim muassasalari oldida ham ko‘plab yangi vazifalar turibdi. Xususan, bugun ular faqat bilim beruvchi muassasa emas, balki innovatsiya, tadbirkorlik va yangi ish o‘rinlari yaratuvchi markazga aylanishi lozimligi belgilandi.
Biz ishonamizki, pedagogika sohasi yoshlar uchun nafaqat milliy taraqqiyot maydoni, balki iqtisodiy barqarorlik va innovasion rivojlanishning muhim drayveriga aylanadi. Yangi avlod pedagoglari mamlakatimizning xalqaro nufuzini yanada yuksaltiradi.
Prezidentimizning yoshlar bilan muloqoti – bu shunchaki uchrashuv emas, balki har bir rahbar, har bir pedagog va har bir mas’ul shaxs zimmasiga yuklangan aniq vazifa va javobgarlikdir.
Biz ham kelgusi faoliyatimizda, albatta, yoshlarimiz bilan yonma-yon ishlaymiz, qo‘llab-quvvatlaymiz va ularning tashabbuslari ro‘yobga chiqishi uchun barcha imkoniyatlarni safarbar etamiz.
Gʻofurjon Muxamedov,
Chirchiq davlat pedagogika universiteti rektori