“El-yurt umidi” jamgʻarmasi kunlari: bilim, taraqqiyot va kelajak uchun teng imkoniyatlar

Mamlakatimizning barcha hududlarida xalqaro taʼlim dasturlarini ommalashtirish, yoshlarni global akademik hamjamiyatga jalb etish va Oʻzbekistonning inson kapitalini mustahkamlashga qaratilgan keng koʻlamli taʼlim marafoni — “El-yurt umidi” jamgʻarmasi kunlari boshlandi.

Navbatdagi manzil — 14-oktabr kuni Chirchiq davlat pedagogika universitetidagi yoshlar bilan ochiq muloqotlar bo‘lib o‘tdi. 

Tadbirlar Boshqaruv samaradorligi agentligi Toshkent viloyati filiali, viloyat hokimligi, maktabgacha va maktab ta’limi boshqarmasi va bir qator hamkorlar ko‘magida tashkil etildi.

Tashabbusning asosiy maqsadi — mamlakatning barcha hududlarini qamrab olish, imkon qadar koʻproq iqtidorli yigit-qizlar, ayniqsa, chekka hududlar va aholining ijtimoiy himoyaga muhtoj qatlamlari vakillari dunyoning yetakchi universitetlarida taʼlim olishning imkoniyatlari haqida maʼlumot olishlarini taʼminlashdir. Chunki Oʻzbekiston Respublikasi Prezidenti Shavkat Mirziyoyev tomonidan bir necha bor taʼkidlanganidek, sifatli taʼlim inson kapitalini rivojlantirish, uzoq muddatli istiqbolda kambagʻallikni qisqartirishning asosiy “harakatlantiruvchi kuchi”dir. Bu soʻzlar davlatning taʼlim sohasidagi butun siyosatining falsafiy asosiga aylanmoqda: nafaqat infratuzilmaga, balki, eng avvalo, insonga, uning bilimi, malakasi va hayotni yaxshi tomonga oʻzgartirish qobiliyatiga sarmoya kiritish.

Uchrashuvlarda “El-yurt umidi” jamg‘armasi ijrochi direktorining birinchi o‘rinbosari Davron Abdurashidov ishtirok etib, jamgʻarma faoliyati, Oʻzbekiston Respublikasi Prezidentining “Iqtidorli mutaxassislarning xorijda taʼlim olishini qoʻllab-quvvatlash, ularda kasbiy koʻnikmalarini rivojlantirish va ragʻbatlantirishga oid qoʻshimcha chora-tadbirlar toʻgʻrisida”gi Farmonida belgilangan yangi vazifalar va yoshlar uchun yaratilayotgan imkoniyatlar haqida so‘zlab berdi. Shuningdek, uchrashuv davomida ochiq stipendiya tanlovlari oʻtkazish tartibi va nomzodlarga qo‘yiladigan talablar tushuntirildi. Stipendiatlar xorijda oʻqishni tugatganidan soʻng ularni Oʻzbekistonda munosib ishga joylashtirish, kasbiy va mansab pogʻonalarida koʻtarish, Milliy kadrlar zaxirasi kiritish kabi masalalar bo‘yicha ma’lumot berildi.

Jamgʻarma xodimlari va stipendiatlari bilan boʻlib oʻtgan ochiq muloqotlar, mahorat darslari va motivatsion uchrashuvlar yoshlarga dunyoning nufuzli jahon taʼlimiga yoʻl barcha uchun — yashash joyi, ijtimoiy mavqeyi yoki oilasining daromad darajasidan qatʼi nazar — ochiqligini koʻrsatdi.

Ushbu tashabbus Jamgʻarma faoliyatining strategiyasi — “hech kim chetda qolmasligi kerak” degan asosiy tamoyilini aks ettiradi. Tadbirlar iqtidorli maktab oʻquvchilari va talabalarni qoʻllab-quvvatlash, xotin-qizlar, kam taʼminlangan oilalar farzandlari, shuningdek, davlat xizmatchilari uchun sifatli taʼlimga teng kirish imkoniyatlarini kengaytirishga qaratilgan.

Jamgʻarma davlat va yoshlar oʻrtasida bilim va ishonchning yangi madaniyatini shakllantirmoqda. “El-yurt umidi” jamgʻarmasi kunlari doirasidagi har bir uchrashuv norasmiy muloqot boʻlib, unda yoshlar muvaffaqiyatning haqiqiy misollarini koʻrib, mamlakat kelajagi ularning qoʻlida ekanligini anglab yetdilar. Oʻzbekistonning zamonaviy siyosati aynan shunday qurilmoqda: taʼlim — bu imtiyoz emas, balki huquq; maqsad emas, balki kuchli jamiyat va barqaror rivojlanish yoʻlidir.