Innovatsion ta’lim muhiti: Yangi texnologiyalar, raqamlashtirish va sun’iy intellekt

     Chirchiq davlat pedagogika universitetida professor-o‘qituvchilar, tadqiqotchilar, talabalar va OAV xodimlari ishtirokida sayyor Kengash yig‘ilishi bo‘lib o‘tdi.

     Yig‘ilish O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga Murojaatnomasi, pedagogik ta’limni raqamlashtirish, “Kelajak o‘qituvchisi” konsepsiyasini ta’lim amaliyotiga tatbiq etish, talabalarda yanada ijodkorlik qobiliyatini shakllantirishga qaratilgan Innovatsion ta’lim muhiti taqdimoti masalalariga bag‘ishlandi.

     Taqdimot orqali hozirgi raqamlashtirish davrida bo‘lajak mutaxassislarni ijodkorlikka yo‘naltirish, innovatsion ta’lim texnologiyalarni tatbiq etish borasida bir qator ijobiy ishlar namoyish etildi.

     Yangi texnologiyalar, raqamlashtirish va sun’iy intellektning pedagog ta’limga ta’siri, professor-o‘qituvchilarning ta’limda zamonaviy texnologiyalardan foydalanish imkoniyatlari, kafedralarning zamonaviy qiyofasi va yangicha pedagogik muhiti universitetning Gumanitar fanlar fakulteti misolida tahlil qilindi.

     Mamlakatimiz iqtisodiyoti ishonchli va barqaror o‘sishda davom etayotgan ayni kunlarda talabalarning ta’lim markazida bo‘lishini va yoshlarning mustaqil bilim olishlarini ta’minlash uchun o‘z sohasidagi bilimlarni mustaxkam egallashdan tashqari innovatsiyalarga asoslangan zamonaviy ta’lim yutuqlari bilan qurollangan bo‘lajak mutaxassislar kerak.

     Taqdimotlarda kelajak o‘qituvchilarini tanqidiy va ijodiy fikrlashga, innovatsion yondashuv asosida darslarni loyihalashga hamda turli ta’lim muhitlariga moslashuvchan ta’lim berishga yo‘naltirilgan ko‘rgazmalar tahlil qilindi.

     Kafedralarda tashkil etilgan ko‘rgazmalarda fan-texnologiya-pedagogika mazmunini uyg‘unlashtirish orqali real ta’lim muammolariga echim topishga qaratilgan.
 

     Talabalar o‘z taqdimotlari orqali ijodiy fikrlash strategiyalarini amaliyotda qo‘llash, IT va turli texnologik vositalar yordamida dars materiallari yaratish, ta’limda sun’iy intellektdan foydalanishning etik jihatlarini tahlil qilish, o‘zaro fikr almashish orqali kasbiy rivojlanish ko‘nikmalarini namoyish etdi.

     Professor-o‘qituvchilar va talabalarning birgalikda muhokamalardagi ishtiroki kelajak o‘qituvchisining asosiy kompetentsiyalari shakllanishiga xizmat qildi. 4+2 asosida ta’lim olayotgan talabalar uchun o‘z g‘oyalarini hamkorlikda himoya qilish, tanqidiy tahlil qilish va ijodiy ishonchni mustahkamlashda muhim tajriba bo‘ldi. Professional tavsiyalar va fikr-mulohazalar bildirildi.

     Kengash ishi XXI asr ta’limi uchun zarur bo‘lgan kreativlik, innovatsiya va hamkorlik muhitini yana bir bor namoyon etdi.

Universitet Axborot xizmati