Kasbga yo‘naltirilgan ta’lim muhitida kelajak o‘qituvchilarini tayyorlash tajribasi va istiqbollari muhokama qilindi

     29-oktyabr kuni rektor G‘ofurjon Muxamedov rahbarligida universitet Kengashining kengaytirilgan sayyor yig'ilishi bo'lib o'tdi. Yig‘ilishda Kengash a’zolari, kafedra mudirlari, yetakchi professor-o‘qituvchilar, bo‘lim rahbarlari ishtirokida Tabiiy fanlar fakultetining kasbga yo‘naltirilgan ta’lim muhitida kelajak o‘qituvchilarini tayyorlash tajribasi va istiqbollari muhokama qilindi.

     Universitet rahbariyati talabalarning o‘zini-o‘zi anglashi va o‘zini-o‘zi rivojlantirishini qo‘llab-quvvatlashga qaratilgan navbatdagi maqsadli dastur sifatida kafedralarda innovatsion ko‘rgazmali vositalar ko'magida ta’lim muhitini mustahkamlashga alohida e’tibor qaratdi. Shu maqsadda Tabiiy fanlar fakulteti tarkibidagi kafedralar tomonidan ta’limga oid zamonaviy yondashuvlarni namoyon etuvchi innovatsion o‘quv ko‘rgazmalarining taqdimoti o‘tkazildi.

     Kafedralarning mustaqil ta’lim jarayonlarida samarali foydalanish uchun mo‘ljallangan ilg‘or texnologiyalar, vizual materiallar, interaktiv maketlar, multimediyaviy vositalar va amaliy ko‘nikmalarni rivojlantirishga yo‘naltirilgan qo‘llanmalar namoyish etildi. Har bir kafedra tomonidan tayyorlangan ko‘rgazmalar nafaqat talabalarning kasbiy rivojlanishiga xizmat qiluvchi, balki ta’limni didaktik jihatdan boyituvchi vosita sifatida taqdim etildi. Fakultet qoshidagi innovatsion ta’lim maydonchalari, kreativ parklar, issiqxonalar faoliyati haqida batafsil ma’lumot berildi. Taqdimot jarayonida professor-o‘qituvchilar faol ishtirok etib, o‘zlarining amaliy tajribalari asosida taklif va mulohazalarini bildirdilar.

     — Mazkur tashabbus talabalarning kasbiy kompetensiyalarini shakllantirish, pedagogik tafakkurini rivojlantirish va nazariy bilimlarni real hayotiy vaziyatlarda qo‘llash malakasini oshirishga qaratilgan, — dedi Tabiiy fanlar fakulteti dekani Otanazar Rahimov. — Shuningdek, bu yondashuv o‘qituvchi va talaba o‘rtasidagi ikki tomonlama interaktiv munosabatni mustahkamlaydi. Talabalarning ushbu ko‘rgazmalarga bo‘lgan qiziqishi esa ularning ta’limga nisbatan motivatsiyasi va ongli yondashuvinoshganidan dalolat berdi.

      Xulosa qilib aytganda, Chirchiq davlat pedagogika universitetida joriy etilgan ushbu tashabbus pedagogik ta’limni zamonaviy innovatsion yondashuvlar asosida tashkil etishga xizmat qilib, xalqaro talablarga mos keluvchi, yetuk, malakali mutaxassislar tayyorlash yo‘lida muhim qadamlardan biri bo‘ldi.

Universitet Axborot xizmati