“Ochiq osmon ostidagi maktab” — mehr, metodika va innovatsiya uyg‘unligi
Pedagogika fakulteti jamoasi tomonidan Parkent tumani 1-sonli maktabda navbatdagi “Ochiq osmon ostidagi maktab” loyihasi doirasida ijtimoiy va metodik tadbir o‘tkazildi. Tadbirning asosiy maqsadi — imkoniyati cheklangan bolalarning ta’lim sifatini oshirish, ularning shaxsiy rivojlanishini qo‘llab-quvvatlash hamda pedagog va ota-onalarga amaliy yordam ko‘rsatishdir.
Ta’limda yangi yondashuv — intensiv diagnostika
Tadbir davomida psixolog va pedagog mutaxassislar tomonidan intensiv diagnostika ishlari amalga oshirildi. Ushbu tizimli jarayon qisqa vaqt ichida bolaning ruhiy, aqliy va ijtimoiy rivojlanish darajasini chuqur tahlil etish imkonini beradi. Bolalarning psixofiziologik holati o‘rganilib, individual rivojlanish xaritalari tuzildi hamda samarali korreksion-pedagogik yondashuvlar ishlab chiqildi.
“Mobil-ekoinklyuziya” laboratoriyasi ilk bor namoyish etildi
Tadbirda ilk bor talabalar tomonidan yaratilgan “Mobil-ekoinklyuziya” laboratoriyasi o‘z faoliyatini namoyish etdi. Ushbu laboratoriyada tabiiy materiallardan — tosh, chig‘anoq, don, suv, yong‘oq va tuxum po‘chog‘idan tayyorlangan vositalar orqali bolalarning aqliy va ijtimoiy rivojlanish darajalari o‘lchandi. Bu ijodiy yondashuv ota-onalar va bolalar tomonidan katta qiziqish bilan qarshi olindi.
Bolalar bilan psixodiagnostika va korreksiya ishlari
Tadbir davomida 58 nafar bolaga qisqa muddatli psixodiagnostika o‘tkazildi. Natijada 33 nafar bolada og‘zaki hisoblash, atrofni idrok etish va tezkor tanishish ko‘nikmalari shakllangani kuzatildi. Bundan tashqari, talabalar har bir bolaga biriktirilib, ularning individual ehtiyojlariga mos metodik yordam ko‘rsatdilar.
O‘qituvchilar uchun master-klasslar
Inklyuziv ta’lim o‘qituvchilari, logopedlar va psixologlar o‘rtasida master-klasslar tashkil etildi. Darslar davomida zamonaviy pedagogik yondashuvlar amaliyotga tatbiq etildi, stressni boshqarish, empatik muloqot va inklyuziv qadriyatlarni chuqur anglash ko‘nikmalari mustahkamlandi. Universitet mutaxassislari tomonidan o‘qituvchilarga yangi metodik qo‘llanmalar taqdim etildi.
Talabalar ijodiy namoyishi va inklyuziv teatr
Talabalar o‘z metodik ishlanmalarini ko‘rgazma shaklida taqdim etdilar. Bu ularning nazariy bilimlarini amaliyot bilan uyg‘unlashtirish, innovatsion g‘oyalarni namoyish etish imkonini berdi. Tadbir yakunida esa “Zamonaviy Zumrad va Qimmat sarguzashtlari” nomli inklyuziv teatr sahnalashtirildi. Ushbu spektaklda imkoniyati cheklangan bolalar, talabalar va o‘qituvchilar bir sahnada chiqish qilib, san’at orqali ijtimoiy integratsiyani mustahkamlashdi.
“Ochiq osmon ostidagi maktab” loyihasi — bu nafaqat ta’limiy tashabbus, balki mehr, bag‘rikenglik va innovatsiya uyg‘unlashgan maydon. Tadbir ishtirokchilari bolalarning imkoniyatlarini ochish, pedagoglar malakasini oshirish va inklyuziv qadriyatlarni targ‘ib etish yo‘lida yana bir muhim qadam tashladilar.
Universitet Axborot xizmati
Galereya
