Raqamli ta’lim muhiti: Pedagogika fakultetida sifatli ta’lim uchun yangi imkoniyatlar

   1-dekabr kuni rektor G‘ofurjon Muxamedov rahbarligida universitet Kengashining kengaytirilgan sayyor yig'ilishi bo'lib o'tdi. Yig‘ilishda Kengash a’zolari, kafedra mudirlari, yetakchi professor-o‘qituvchilar, bo‘lim rahbarlari ishtirokida Pedagogika fakultetining kasbga yo‘naltirilgan ta’lim muhitida kelajak o‘qituvchilarini tayyorlash tajribasi va istiqbollari muhokama qilindi.

     Universitet rahbariyati talabalarning o‘zini-o‘zi anglashi va o‘zini-o‘zi rivojlantirishini qo‘llab-quvvatlashga qaratilgan navbatdagi maqsadli dastur sifatida kafedralarda innovatsion ko‘rgazmali vositalar ko'magida ta’lim muhitini mustahkamlashga alohida e’tibor qaratdi. Shu maqsadda Pedagogika fakulteti tarkibidagi kafedralar tomonidan ta’limga oid zamonaviy yondashuvlarni namoyon etuvchi innovatsion o‘quv ko‘rgazmalarining taqdimoti o‘tkazildi.

     Kafedralarning mustaqil ta’lim jarayonlarida samarali foydalanish uchun mo‘ljallangan ilg‘or texnologiyalar, vizual materiallar, interaktiv maketlar, multimediyaviy vositalar va amaliy ko‘nikmalarni rivojlantirishga yo‘naltirilgan qo‘llanmalar namoyish etildi. Har bir kafedra tomonidan tayyorlangan ko‘rgazmalar nafaqat talabalarning kasbiy rivojlanishiga xizmat qiluvchi, balki ta’limni didaktik jihatdan boyituvchi vosita sifatida taqdim etildi. Taqdimot jarayonida professor-o‘qituvchilar faol ishtirok etib, o‘zlarining amaliy tajribalari asosida taklif va mulohazalarini bildirdilar.

     "Universitetlarda o’qish va ta’lim tashkilotida ishlash o’rtasida bo’lajak o’qituvchilarni tayyorlashning kamchiliklarini tuzatish va talabalarni to’liq kasbiy faoliyatga tayyorlaydigan metodik modelning zamonaviylashtirish yanada dolzarblashdi. Bitiruvchisi mehnat bozorida o’zini ishonchli his qilishi kerak. O’qituvchilar tayyorlashning talab darajasiga erishish uchun samarali ta’lim - kasbiy faoliyatga yo’naltirilgan, ko’p kontekstli va ilg’or kasbiy ta’lim texnologiyalaridan foydalangan holda zamonaviy ta’lim muhitini shakllantirishga harakat qildik", —  dedi Pedagogika fakulteti dekani Jabbor Usarov.

Universitet Axborot xizmati