San’atshunoslikning dolzarb masalalariga bag‘ishlangan xalqaro anjuman bo‘lib o‘tdi

     Joriy yilning 22-23-oktyabr kunlari Chirchiq davlat pedagogika universiteti tashabbusi bilan “Oliy pedagogik taʼlimda tasviriy sanʼat, chizmachilik va musiqa fanlarini oʻqitishda zamonaviy yondashuv va tendensiyalar” mavzusida xalqaro ilmiy-amaliy konferensiya tashkil etildi.

     Tadbirda san’at va madaniyatshunoslik sohasidagi zamonaviy muammolar muhokama qilindi. Unda nafaqat o‘zbekistonlik olimlar, balki Qozog‘iston, Tojikiston, Qirg‘iziston, Rossiya kabi o‘ndan ortiq davlatlardan tashrif buyurgan san’atshunos olimlar ham ishtirok etib, o‘z ilmiy qarashlarini taqdim etdilar. Bu esa mazkur anjumanning xalqaro miqyosdagi ahamiyati va nufuzidan dalolat beradi.

     Anjumanda O‘zbekiston hunarmandlar uyushmasi raisi Rasul Mirzahmedov rahbarligida bir guruh usta-hunarmandlar ham qatnashdilar. Rishton hunarmanchilik markazi rahbari Alisher Nazirov, Badiiy akademiya vakillari ishtiroki nazariyani amaliyot bilan uyg‘unligini ta’minladi.

     Xalqaro konferensiya davomida San’atshunoslik fakultetidagi ijodiy va ilmiy yo‘nalishlarda olib borayotgan ishlari, xususan kulolchilik, amaliy san’at, tasviriy san’at hamda muhandislik grafikasiga oid loyihalar namoyish etildi. Talabalar tomonidan yaratilgan badiiy va amaliy san’at ishlari ularning innovatsion yondashuvi va ijodiy tafakkuri mehmonlarda iliq taassurot qoldirdi. Konferentsiya ishtirokchilar talabalarning ustoz-shogird an’anasi asosida olib borilayotgan amaliy mashg‘ulotlarni yuqori baholadilar.

     Mehmonlarga San’atshunoslik fakulteti qoshida faoliyat yuritayotgan o‘quv markazlarida tashkil etilgan ustoz-shogird an’anasi asosidagi individual ta’lim, mustaqil ta’lim jarayoni, talabalar tomonidan tayyorlangan kulolchilik buyumlari, amaliy san’at namunalari hamda muhandislik grafikasi asosidagi ijodiy ishlar taqdim etildi. Tikuvchilik, kulolchilik, 3D printer va lazer texnologiyalari asosida tijorat uchun yaratilgan mahsulotlar mehmonlarda katta qiziqish uyg'otdi. Namoyish etilgan ishlar nafaqat milliy hunarmandchilik an’analarini zamonaviy texnologiyalar bilan uyg‘unlashtirgan, balki talabalarning ijodkorlik salohiyati va texnik bilimlarini amalda qo‘llay olish ko‘nikmalarini ham yaqqol namoyon etdi. 

    Talabalar tomonidan yaratilgan san'at mahsulotlari o‘zining estetik jozibadorligi, innovatsion yondashuvi va amaliy ahamiyati bilan konferensiya ishtirokchilarida yuqori e’tirofga sazovor bo‘ldi. Mehmonlar bu ishlarda milliy qadriyatlar bilan zamonaviy dizayn yondashuvlari uyg‘unligini alohida e’tirof etdilar.

     Ikki kun davom etgan konferensiyada ilmiy bahs-munozaralarga boy o‘tdi va ko‘plab dolzarb g‘oya va takliflar ilgari surildi.

Universitet Axborot xizmati