Ta’lim sifatini oshirish chora-tadbirlariga bag‘ishlangan respublika seminar-treningi o‘tkazildi

Chirchiq davlat pedagogika universiteti (CHDPU) tomonidan O‘zbekiston Respublikasi Maktabgacha va maktab ta’limi vazirligining 2025 yil 9 oktabrdagi 03-167-sonli reja-jadvali ijrosi doirasida muhim seminar-trening tashkil etildi. Seminar-trening CHDPUda 2025 yil 11 noyabr kuni “Pedagogik oliy ta’lim tashkilotlarida ta’lim sifatini oshirish yuzasidan chora-tadbirlarni belgilash va amaliyotga tatbiq etish” mavzusida Zoom platformasi orqali o‘tkazildi.
 

Ushbu tadbir O‘zbekiston Respublikasi Prezidentining 2025 yil 5 maydagi PF-76-sonli Farmoni va Vazirlar Mahkamasining 498-sonli qarori talablari asosida ta’lim sifati tizimini takomillashtirish vazifalariga bag‘ishlandi. Seminar-treningda Vazirlik tizimidagi barcha pedagogika oliy ta’lim tashkilotlarining, jumladan, reja-jadvalda keltirilgan barcha ta’lim muassasalarining ta’lim sifatini ta’minlashga mas’ul bo‘lgan xodimlari ishtirok etdi.
 

Seminarni CHDPU O‘quv ishlari bo‘yicha prorektori D.B. Axmadjonov ochib berdi. Shundan so‘ng universitetining Ta’lim sifatini ta’minlash bo‘limi boshlig‘i S.X. Gayupova tadbirning asosiy maqsadi PF-76-sonli Farmon va 498-sonli qaror talablari asosida pedagogik OTMlarda ta’lim sifatini oshirishning tizimli chora-tadbirlarini muhokama qilishdan iborat ekanligini ta’kidladi. So‘ngra Chirchiq davlat pedagogika universiteti misolida ta’lim sifatini oshirish bo‘yicha amalga oshirilayotgan chora-tadbirlarning to‘g‘ri belgilanayotganligi va tizimli ekanligi bo‘yicha ma’ruza qilindi. Xususan, taqdimotda CHDPU tomonidan joriy etilgan asosiy chora-tadbirlar aniq natijalar bilan ko‘rsatildi.

      Jumladan, CHDPUda professor-o‘qituvchilarning faoliyatini baholovchi KPI (eng muhim samaradorlik ko‘rsatkichlari) tizimi joriy etilgan bo‘lib, bu tizim Vazirlar Mahkamasining 498-sonli Qarori talab qilgan hisobdorlik tamoyilini ta’minlashga qaratilgan hamda ilmiy-innovatsion faollikni baholaydi.

Shuningdek, CHDPUda uzoq va o‘rta muddatga mo‘ljallangan Pedagogik ta’lim innovatsion klasteri (PTIK) va “Uchinchi pedagog” strategiyasi tasdiqlangan. Ushbu strategiyaning asosiy maqsadlari sifatida o‘qituvchining kasbiy mahoratining yangi sifat darajasini ta’minlash va uzluksiz pedagogik ta’lim milliy tizimining xalqaro reytingini oshirish belgilangan.

Ilmiy natijadorlikni oshirish bo‘yicha ham tizimli ishlar yo‘lga qo‘yilgan, 2025 yil yanvar oyidan boshlab “Xalqaro jurnallar va reytinglar bilan ishlash guruhi” tashkil etilgan, natijada 2025 yil noyabr holatiga ko‘ra Scopus'da 89 ta maqola nashr etilishiga erishilgan.

Amaliyot bazalari va integratsiya borasida CHDPU ta’lim sifatining “Ish beruvchilar ishtiroki” mezonini bajarish maqsadida Pedagogik ta’lim innovatsion klasteri (PTIK) orqali Bog‘cha-laboratoriya, Maktab-laboratoriya va “InCorLab” (Inklyuziv va korreksion laboratoriya) kabi muammoli o‘qitishga imkon beruvchi amaliy maydonchalar yaratilgan. Bundan tashqari, “Agro-bio-geo-kimyo” kabi fanlararo ilmiy maydonchalar majmuasi “Eshitdim-Ko‘rdim-Bajardim” tamoyili asosidagi amaliy o‘qitishni ta’minlamoqda.

Nihoyat, Raqamli transformatsiya va shaffoflik chora-tadbirlari doirasida Sun’iy intellekt (AL) laboratoriyasini tashkil etish va SI-botlarni joriy etish orqali o‘qituvchilarning dars reja, blanka va test tuzish kabi yuklamasi kamaytirilmoqda. Shuningdek, SI asosida shaffof va obyektiv baholash tizimlari, xususan, HEMIS bilan integratsiyada qatnashmagan darslarni qayta o‘zlashtirish jarayonini subyekt aralashuvisiz tashkil etish va talabalarning CEFR darajasini aniqlash uchun AL-diagnostika tizimlari ishlab chiqilmoqda. Bu chora-tadbir baholashning obyektivligini (498-sonli qaror talabi) oshiradi.

Tadbirning so‘nggi qismida ishtirokchilar o‘rtasida mavzu yuzasidan qizg‘in savol-javoblar hamda fikr almashinuvlar bo‘lib o‘tdi. Jumladan, AL texnologiyalarini baholash jarayoniga integratsiya qilish va kadrlarni xalqaro standartlar (Cambridge modeli) bo‘yicha tayyorlash borasidagi amaliy tajribalar yuzasidan savollar berildi. Muhokamalar ochiq va konstruktiv muhitda o‘tib, pedagogik OTMlarda ta’lim sifatini oshirish bo‘yicha tizimli chora-tadbirlarni belgilash bo‘yicha tajriba almashish imkoniyatini yaratdi.

Universitet tomonidan mazkur seminar-treningning to‘liq o‘tkazilganligi va unda barcha rejadagi ta’lim muassasalarining mas’ul xodimlari ishtirok etganligi hamda ta’lim sifatini ta’minlash chora-tadbirlarining to‘g‘ri belgilanayotganligiga doir xulosalar aks ettirilgan hisobot 2025-yil 11-noyabr kuni vazirlikka taqdim etildi.