"Ta’limda hamkorlik” – ilm va amaliyot integratsiyasining yangi bosqichi

     O‘zbekiston Respublikasi Prezidentining 2025-yil 28-apreldagi “Pedagog kadrlar tayyorlash tizimini yanada takomillashtirish chora-tadbirlari to‘g‘risida”gi PF-73-son Farmonida belgilangan vazifalarning ijrosini ta’minlash maqsadida Chirchiq davlat pedagogika universiteti Fizika kafedrasi professor-o‘qituvchilari hamda Fizika va astronomiya ta’lim yo‘nalishida tahsil olayotgan talabalar Toshkent viloyati Parkent tumani 5-son ixtisoslashgan davlat umumta’lim maktabida “Ta’limda hamkorlik” loyihasi doirasida tadbir o‘tkazdi.

     Mazkur tadbir ta’lim tizimida oliy ta’lim muassasalari bilan umumta’lim maktablari o‘rtasidagi uzviy hamkorlikni mustahkamlash, zamonaviy pedagogik texnologiyalarni amaliyotga joriy etish va yosh avlodda ilmiy tafakkur hamda ijodkorlikni rivojlantirishga qaratildi.

     Dastlab so‘z O‘zbekistonda xizmat ko‘rsatgan fan arbobi, kimyo fanlari doktori, Chirchiq davlat pedagogika universiteti rektori professor G‘afurjon Isroilovich Muxamedovga berildi. G‘afurjon Muxamedov o‘z chiqishida universitet va maktablar o‘rtasida yo‘lga qo‘yilgan hamkorlikning ahamiyatini, “ta’lim klasteri” konsepsiyasining samarali mexanizmlarini va fizika fanini o‘qitishda innovatsion yondashuvlarning o‘rni haqida batafsil ma’lumot berdi.

     Shundan so‘ng fizika darsliklari muallifi, kafedra dotsenti Kusharboy Suyarov maktab amaliyotida qo‘llanilayotgan yangi metodik yondashuvlar, ilmiy-ijodiy loyihalar va talabalarning o‘quv jarayonidagi faol ishtiroki haqida so‘z yuritdi. Tadbir davomida Fizika kafedrasi professor-o‘qituvchilari tomonidan yaratilgan o‘quv-uslubiy adabiyotlar maktab o‘qituvchilari va o‘quvchilariga tantanali tarzda topshirildi. Ushbu adabiyotlar zamonaviy fizika ta’limida qo‘llaniladigan laboratoriya ishlari, klaster asosidagi dars metodikasi hamda amaliy tavsiyalarni o‘z ichiga olgan bo‘lib, ta’lim sifatini oshirishda muhim manba sifatida xizmat qiladi.

     Tadbirning eng qiziqarli qismi sifatida universitet talabalari tomonidan elektromagnit induksiya, optik hodisalar, suyuqlik bosimi va mexanik tebranishlarga oid qiziqarli tajribalar namoyish etildi. O‘quvchilar tajribalarda faol ishtirok etib, ilmiy kuzatuvchanlik, mantiqiy fikrlash va texnik tafakkur ko‘nikmalarini mustahkamlash imkoniga ega bo‘ldilar.

     Shuningdek, Chirchiq davlat pedagogika universiteti jamoasi tomonidan maktabga STEAM tadqiqotlari markazida tayyorlangan maktab fizika laboratoriya jihozlari sovg‘a qilindi. Mazkur jihozlar o‘quvchilarda amaliy tajriba asosida o‘rganish, ijodiy fikrlash va muammoli vaziyatlarda mustaqil qaror qabul qilish ko‘nikmalarini rivojlantirishga xizmat qiladi. Tadbir yakunida talabalar maktab o‘quvchilari bilan birgalikda ushbu jihozlardan foydalanish bo‘yicha amaliy mashg‘ulotlar o‘tkazishdi. O‘quvchilar qurilmalar bilan ishlash, xavfsizlik qoidalariga rioya etish va tajriba natijalarini tahlil qilishni o‘rgandilar.

     Tadbir so‘ngida “Ta’limda hamkorlik” loyihasining ta’lim tizimida ilmiy-amaliy integratsiyani chuqurlashtirish, yosh avlodda ilmga qiziqish va ijodkorlikni rivojlantirishdagi ahamiyati ta’kidlandi. Chirchiq davlat pedagogika universiteti jamoasi bu an’anani izchil davom ettirish, yoshlarni fan va innovatsiyaga yo‘naltirish, maktab va universitet o‘rtasida samarali ilmiy-tajriba maydonini shakllantirishni maqsad qilganini bildirdi. 

Universitet Axborot xizmati