“Tabiatni asrash – insonni, Vatanni asrash demakdir!”

     Chirchiq davlat pedagogika universitetida “Tabiatni asrash – insonni, Vatanni asrash demakdir!” shiori ostida ekologik ma’rifiy tadbir hamda foto va tasviriy san’at asarlari ko‘rgazmasi bo‘lib o‘tdi.

     O‘zbekiston “Tasviriy oyina” ijodiy uyushmasi, Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi, O‘zbekiston Ekologiya partiyasi viloyat kengashi va boshqa qator tashkilotlar hamkorligida o‘tkazilgan tadbirda sohalar mutaxassislari, musavvir va fotoijodkorlar, partiyalar faollari, tibbiyot xodimlari, “Yosh ekologlar” harakati a’zolari, keng jamoatchilik vakillari ishtirok etdi.

     Ishtirokchilar “Tasviriy oyina” ijodiy uyushmasi tashabbusi bilan Chirchiq davlat pedagogika universitetida tashkil etilgan ona tabiatni asrab-avaylash, talabalarning bu boradagi bilim va tushunchalarini boyitish mavzusidagi foto hamda tasviriy san’at asarlari ko‘rgazmasi bilan tanishdi.

     Asosiy tadbir Rektorat majlislar zalida mamlakatimiz madhiyasi sadolari bilan boshlandi. Dastlab mavzu doirasida tayyorlangan videofilm namoyish etildi.

     So‘z olgan Chirchiq davlat pedagogika universiteti rektori G‘ofurjon Muxamedov, “Tasviriy oyina” ijodiy uyushmasi raisi Isfandiyor Latipov, Oliy majlis qonunchilik palatasi deputati Mohira Xodjayeva va boshqalar tomonidan mamlakatimizda ona tabiatni asrab-avaylash, ekologiya, atrof-muhit musaffoligini ta’minlash, suv va boshqa tabiiy resurslardan oqilona foydalanish, aholi, xususan, yoshlarning ekologik bilimlarini yuksaltirish borasida keng ko‘lamli ishlar olib borilayotganligi ta’kidlandi, tadbirning maqsad, mazmun-mohiyati haqida ma’lumotlar berildi.

     O‘zbekiston Respublikasi Prezidentining 2025 yil 30 yanvardagi “O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida”gi farmoni ijrosini ta’minlash, aholining ekologik madaniyatini yuksaltirish bo‘yicha ko‘rilayotgan chora-tadbirlar samaradorligini yanada oshirish, ushbu yo‘nalishda davlat organlarining fuqarolar, nodavlat notijorat tashkilotlar va fuqarolik jamiyatining boshqa institutlari bilan o‘zaro hamkorlikdagi sa’y-harakatlarini hamda fuqarolar ekologik bilimlarini oshirishga qaratilgan tashabbuslarni qo‘llab-quvvatlash maqsadida joriy yil 15 mayda davlatimiz rahbarining “2030 yilgacha bo‘lgan davrda aholining ekologik madaniyatini yuksaltirish konsepsiyasini tasdiqlash to‘g‘risida”gi qarori qabul qilindi. Tadbirda mazkur konsepsiyada belgilangan vazifalar xususida atroflicha so‘z yuritildi.

     – Bugungi kunda insoniyat oldida ikkita katta tahdid turibdi, – deydi Biologiya kafedrasi dotsenti Xolida Ro‘zimova. – Birinchisi turli urushlarning kelib chiqishi bo‘lsa, ikkinchisi ekologik, iqlim o‘zgarishi bilan bog‘liq muammolardir. Shu bois ham urush xavfining oldini olish, tabiatni asrash, ekologik muvozanatni saqlash masalasi har bir kishining ham fuqarolik, ham ma’naviy burchiga aylanishi kerak.

     Qolaversa, bu borada tabiat va shaxs munosabatlarida aholining atrof-muhitga ehtiyotkorona munosabatda bo‘lish ko‘nikmalarini boyitish, aholi, ayniqsa, yoshlar ongida tabiatga muhabbat, qonunlarga rioya etish tushunchasini mustahkamlash, fuqarolarning ekologik madaniyatini yuksaltirishda targ‘ibotning innovatsion usullaridan keng foydalanish, bu borada ommaviy axborot vositalari rolini hamda aholi va mansabdor shaxslarning burch va majburiyatlarini kuchaytirish masalalariga alohida e’tibor qaratish muhimdir.

     Tadbirda mutaxassislar, ishtirokchilar tomonidan mazkur yo‘nalishdagi ishlar samaradorligini oshirish, ayniqsa, bog‘cha, maktablarda ekologik madaniyatni shakllantirish, yuksaltirishga qaratilgan bilimlarni muntazam berib borish, tibbiyot xodimlari, patronaj hamshiralar, volontyorlar, “Yosh ekologlar” harakati a’zolari orqali aholi o‘rtasida targ‘ibot ishlarini kuchaytirish yuzasidan taklif, fikr va mulohazalar bildirildi.

     “Tabiatni asrash – insonni, Vatanni asrash demakdir!” mavzusidagi ekologik ma’rifiy tadbirlar, foto va tasviriy san’at asarlari ko‘rgazmasi viloyatning barcha tuman va shaharlarida, shuningdek, ta’lim muassasalarida o‘tkazilishi belgilangan.

Universitet Axborot xizmati