Transformatsiya 2025: Universitet 4.0 – “Ta’lim, fan, innovatsiya va jamiyat bilan raqamlashgan o‘zaro aloqa” modeli

2025-yil uchun belgilangan Transformatsiya 2025 dasturi doirasida universitetda Universitet 4.0 konsepsiyasiga o‘tish jarayoni boshlandi. 8-oktabr kuni bo‘lib o‘tgan universitet kengashining navbatdan tashqari yig‘ilishida ushbu model – “Ta’lim, fan, innovatsiya va jamiyat bilan raqamlashgan o‘zaro aloqa” konsepsiyasi asosida amalga oshirilayotgan ishlar muhokama qilindi.

Yig‘ilishda universitetning ichki va tashqi imidjini yuksaltirish, raqamli boshqaruv tizimini takomillashtirish hamda xalqaro standartlarga mos raqamli transformatsiya jarayonlarini jadallashtirish masalalari ko‘rib chiqildi. Rektorning maxsus vakili Nasrulla Satlikov ushbu yo‘nalishdagi amalga oshirilgan ishlar haqida ma’ruza qildi.

U o‘z chiqishida universitet strategiyasi, raqamli infratuzilma rivoji, mTalim platformasi bilan integratsiya, shuningdek, ta’lim sifatini oshirish va innovatsion boshqaruv tizimlarini joriy etish borasida olib borilayotgan yangilanishlarga e’tibor qaratdi.

Shuningdek, yig‘ilishda universitetning yangi rasmiy veb-sayti taqdim etildi. Unda ma’muriy jarayonlarni avtomatlashtirish, o‘qituvchi va talabalarning raqamli faoliyatini kuzatish, ta’lim sifati va boshqaruv samaradorligini oshirishga xizmat qiluvchi innovatsion funksiyalar joriy etilgan.

Yig‘ilish yakunida yangilangan reyting tizimini tatbiq etish bo‘yicha qaror qabul qilindi. Endilikda o‘qituvchilar reytingi shakllantirilayotganda talabalar fikri, mTalimdagi faollik, saytdagi shaxsiy sahifa holati va ilmiy-ommabop postlar e’lon qilish faoliyati ham inobatga olinadi.

Universitet rahbariyati raqamli faollikni oshirish, xalqaro ilmiy hamkorlikni kengaytirish hamda QS Top 500 talik xalqaro reytingiga kirish maqsadini ustuvor yo‘nalish sifatida belgiladi.

Transformatsiya 2025 – bu ta’lim, fan va innovatsiyani birlashtirgan, raqamli kelajak sari dadil qadamdir.