Universitet prorektori kutilmaganda “Birinchi kurs maktabi” ishtirokchilariga gid bo‘ldi

     Kecha “Birinchi kurs maktabi” dasturi ishtirokchilari Chirchiq davlat pedagogika universiteti qoshidagi “Qatag‘on qurbonlari muzeyi”ni ziyorat qildi. Yoshlar masalalari va maʼnaviy-maʼrifiy ishlar boʻyicha prorektor Samariddin Qorayev universitet talabalari va mehmonlar uchun gid vazifasini bajarib bordi.

     Shu o‘rinda, prorektor Samariddin Qorayev azal-azaldan “ilmli va madaniyatli insonlar” degan sharafli nomga sazovor bo‘lib kelgan yurtimiz yoshlarini hur fikrli, taraqqiyparvar, jadidchilik g‘oyalariga moyil bo‘lib shakllanishlari uchun hatto gid bo‘lishga tayyorligini namoyon etdi.

     Muzeydagi eksponatlar orqali talabalar mamlakatimizning murakkab tarixiy davrlarida yuz bergan fojialar, qatag‘on qurbonlarining jasorati, iroda va sabr-bardoshi haqida atroflicha ma’lumot olishdi. Tashrif talabalarda tarixiy xotirani qadrlash va huquqiy ongni rivojlantirishda muhim tarbiyaviy ahamiyat kasb etdi.

Universitet Axborot xizmati