Xalqaro Konferensiya sport ta’limini rivojlanish maqsadlari: yutuqlar va istiqbollar

     O‘zbekiston Respublikasida ta’lim tizimini, xususan, jismoniy tarbiya va sport sohasini modernizatsiya qilish, uni xalqaro standartlarga mos ravishda rivojlantirish borasida keng ko‘lamli islohotlar amalga oshirilmoqda. “Yangi O‘zbekiston – sog‘lom avlod poydevori” tamoyiliga tayanilgan holda, mamlakatimizda yoshlarda sog‘lom turmush tarzini shakllantirish, ularning jismoniy, ma’naviy va aqliy salohiyatini har tomonlama rivojlantirish davlat siyosatining ustuvor yo‘nalishlaridan biri sifatida e’tirof etilgan.

     Shu nuqtai nazardan, Chirchiq davlat pedagogika universiteti tomonidan 2025-yil 17–18 - oktabr kunlari tashkil etilgan “Jismoniy tarbiya tizimini rivojlantirishning dolzarb muammolari va istiqboldagi yechimlari” mavzusidagi xalqaro ilmiy-amaliy konferensiya zamonaviy ta’lim, ilm-fan va sport sohasidagi ilg‘or tajribalarni uyg‘unlashtirish, innovatsion pedagogik yondashuvlarni tatbiq etish hamda sohaga oid ilmiy-tadqiqotlar samaradorligini oshirishga qaratilgan muhim ilmiy voqea bo‘ldi.

     Anjumanda O‘zbekiston Respublikasi Oliy ta’lim, fan va innovatsiyalar vazirligi, Maktabgacha va maktab ta’limi vazirligi hamda Sport vazirligi tomonidan ilgari surilgan strategik maqsad va ustuvor yo‘nalishlar asosida, jismoniy tarbiya tizimini takomillashtirishning konseptual asoslari, zamonaviy axborot-kommunikatsiya texnologiyalarini ta’lim jarayoniga integratsiya qilish, o‘quvchi va talabalarni sog‘lom turmush tarziga yo‘naltirish masalalari keng muhokama qilindi.

     Xalqaro konferensiyada mamlakatimiz oliy ta’lim muassasalari bilan bir qatorda Rossiya, Eron, Janubiy Koreya, Polsha, Turkiya, Qozog‘iston, Ozarbayjon kabi davlatlarning nufuzli universitetlari va ilmiy markazlaridan olimlar, amaliyotchi mutaxassislar hamda yosh tadqiqotchilar faol ishtirok etishdi. Ular o‘z ma’ruzalari orqali jismoniy tarbiya tizimini rivojlantirishda innovatsion yondashuvlar, raqamli texnologiyalarni qo‘llash, sport ta’limining didaktik mexanizmlarini takomillashtirish hamda xalqaro hamkorlikning yangi istiqbollarini yoritib berishdi.

     Konferensiya doirasida quyidagi yo‘nalishlarda sho‘balar faoliyat olib bordi:
• maktabgacha ta’lim tizimida jismoniy tarbiya mashg‘ulotlarini takomillashtirish;
• umumiy o‘rta ta’lim muassasalarida jismoniy tarbiya darslari sifatini oshirish;
• bo‘lajak jismoniy madaniyat mutaxassislarini tayyorlashning innovatsion mexanizmlari;
• pedagogik jarayonda ta’lim-tarbiya tizimining dolzarb muammolari.

     Mazkur konferensiya ta’lim va sport sohalarida ilg‘or tajribalarni almashish, innovatsion ilmiy g‘oyalarni amaliyotga tatbiq etish, xalqaro hamkorlikni mustahkamlash, shuningdek, yosh olimlar faoliyatini qo‘llab-quvvatlash borasida muhim ahamiyat kasb etdi. Taqdim etilgan ilmiy ma’ruzalar jismoniy tarbiya tizimini yangi bosqichga olib chiqish, sohada kompetensiyaviy yondashuv va raqamli ta’limni keng joriy etish bo‘yicha amaliy tavsiyalarni ilgari surdi.
     
     Anjuman materiallarida jamlangan maqolalar va ma’ruzalar to‘plami nafaqat jismoniy tarbiya tizimini rivojlantirishda, balki butun ta’lim tizimi uchun metodik manba sifatida ham xizmat qiladi. Ushbu nashrda e’lon qilinayotgan ilmiy ishlanmalar sport sohasida raqamli texnologiyalarni keng qo‘llash, pedagogik innovatsiyalarni rivojlantirish hamda zamonaviy ta’lim jarayonini tashkil etishning dolzarb yo‘nalishlarini o‘zida mujassam etgan.