Yangi bosqich, yangi marralar: CHDPUda birinchi kurs talabalari uchun o‘quv yili boshlandi

     Bugun, 3-sentabr kuni Chirchiq davlat pedagogika universitetida birinchi bosqich talabalari uchun yangi o‘quv yili boshlandi. Shu munosabat bilan “Birinchi kurs maktabi” dasturi doirasida tantanali tadbir o‘tkazildi.

     O‘zbekiston Respublikasi Davlat madhiyasining yangrashi bilan boshlangan tantanali tadbirda universitet rahbariyati, professor-o‘qituvchilar, birinchi bosqichga qabul qilingan talabalar hamda ularning ota-onalari ishtirok etdi.

     Tadbirda so‘zga chiqqanlar Chirchiq davlat pedagogika universiteti mamlakatimizda o‘zining ilmiy salohiyati, zamonaviy ta’lim dasturlari, yetuk kadrlar tayyorlash tajribasi va xalqaro hamkorlikdagi nufuzli o‘rni bilan e’tirof etilayotgani alohida ta’kidlandi.

     Tadbir ishtirokchilari yangi o‘quv yilida ilk qadam qo‘yayotgan talabalarga 4 yil davomida samarali va muvaffaqiyatli ta’lim olishlari, yangidan yangi marralarni zabt etishlari hamda o‘z ustida muntazam ishlash orqali mustaqil fikrlaydigan, raqobatbardosh mutaxassislar bo‘lib yetishishlarini tiladilar.

     Shuningdek, “Birinchi kurs maktabi” dasturining boshlanishi talabalarga nafaqat akademik bilimlarni egallash, balki universitet muhitiga tezkor moslashish, yangi do‘stlar orttirish, ijtimoiy faol bo‘lish va o‘z qobiliyatlarini namoyon etish uchun keng imkoniyatlar yaratishi qayd etildi.

     Shundan so‘ng, barcha talabalar “Birinchi kurs maktabi” doirasidagi seminar-trening va dars mashg‘ulotlariga yo‘l oldi.